Ukraynaya iki il ərzində 140 milyard avro hərbi yardım ayrılacaq
saida
Ukrayna 2026 və 2027-ci illərdə NATO və Avropa İttifaqındakı qərbli tərəfdaşlarından ümumilikdə 140 milyard avro hərbi yardım alacaq. Bu barədə Le Figaro diplomatik mənbələrə istinadən məlumat yayıb.
Nəşrin məlumatına görə, yardım hər il 70 milyard avro olmaqla iki il ərzində ayrılacaq. Bu məbləğə Avropa İttifaqının Ukraynaya 2026-2027-ci illər üçün artıq vəd etdiyi 60 milyard avro da daxildir.
Bildirilir ki, iyulun 8-də Ankarada keçiriləcək NATO sammiti çərçivəsində görüş iştirakçıları Ukraynaya həm 2026-cı, həm də 2027-ci ildə 70 milyard avro həcmində hərbi yardım göstərmək öhdəliyi götürəcəklər.
Daha əvvəl NATO-nun mətbuat xidməti bildirmişdi ki, alyansın 7-8 iyul tarixlərində Ankarada keçiriləcək sammiti çərçivəsində müdafiə sənayesi üzrə yüksək səviyyəli görüş baş tutacaq. Avropa Komissiyası isə tədbirdə qurumun sədri Ursula fon der Lyayenin çıxış edəcəyini açıqlayıb.
KİV-in NATO-nun Ankara sammitinin bəyanat layihəsinə istinadən yaydığı məlumata görə, sənəddə Rusiyanın Avroatlantik regionun təhlükəsizliyi və sabitliyi üçün “uzunmüddətli təhdid” yaratdığı qeyd olunacaq. Bununla belə, layihənin hələ dəqiqləşdirilməli olduğu bildirilir.
