Cənubi Afrikada etirazçılar əcnəbilərin deportasiyasını tələb edir

Cənubi Afrikada əcnəbi əleyhinə etiraz aksiyaları yenidən gündəmə gəlib.

Ölkənin bir sıra şəhərlərində minlərlə insan küçələrə çıxaraq sənədsiz miqrantların ölkədən çıxarılmasını tələb edib.

Ən böyük yürüşlərdən biri Durban şəhərində keçirilib. IOL/Mercury nəşrinin məlumatına görə, Durban küçələrində on minlərlə etirazçı yürüş edib. Sosial şəbəkələrdə yayılan görüntülərdə insanların şəhər mərkəzində toplandığı, bəzilərinin pankart və sopalar daşıdığı, təhlükəsizlik qüvvələrinin isə ərazidə nəzarət tədbirləri gördüyü görünür.

Etirazçılar Cənubi Afrikada yaşayan sənədsiz əcnəbilərin deportasiya edilməsini tələb ediblər. Aksiyalar “March and March”, “Operation Dudula” və digər miqrasiya əleyhinə qrupların çağırışları fonunda keçirilib.

AP yazır ki, etirazlar ümumilikdə əsasən dinc keçsə də, bəzi yerlərdə talan və gərginlik halları qeydə alınıb. Reuters isə bir neçə bölgədə zorakılıq, polis müdaxiləsi və miqrantlara qarşı təzyiqlərin yaşandığını bildirib.

Cənubi Afrikada qeyri-qanuni miqrasiya, işsizlik və iqtisadi çətinliklər fonunda əcnəbi əleyhinə çıxışlar son illərdə tez-tez gündəmə gəlir. Hüquq müdafiəçiləri isə miqrantların ölkədəki sosial və iqtisadi problemlərə görə hədəfə çevrildiyini bildirirlər.

DenMedia.az

Rəsmilər aksiyaları yaxından izləyir və mümkün insidentlərin qarşısını almaq üçün təhlükəsizlik tədbirlərini gücləndiriblər.