“Sizə sədaqətlə xidmət etdim”: Vuçiç prezidentlikdən getməyə hazırlaşdığını bildirdi

Serbiya Prezidenti Aleksandar Vuçiç Belqradda Assambleya binası qarşısında keçirilən mitinqdə dövlət başçısı kimi səlahiyyət müddətinin başa çatmaq üzrə olduğunu bildirib. Bu barədə N1 məlumat yayıb.

Vuçiç çıxışında hər zaman yalnız xalqının maraqları naminə hərəkət etdiyini vurğulayıb.

“Yəqin ki, bu, respublika prezidenti kimi sizə son müraciətimdir. Son 14 ildə sizə sədaqətlə xidmət etmişəm. Mənə deyirdilər ki, heç vaxt prezident postunu tərk etməyəcəyəm. Bunlar respublika prezidenti vəzifəsində son günlərim və həftələrimdir”, — deyə o bildirib.

Vuçiç Serbiya Prezidenti vəzifəsini 31 may 2017-ci ildən tutur. O, 2022-ci ildə ikinci müddətə yenidən seçilib. Onun səlahiyyət müddətinin 2027-ci ilin mayında başa çatmalı olduğu bildirilirdi.

Daha əvvəl Belqradda ölkə prezidentinin kursuna və hakim Serb Tərəqqi Partiyasına dəstək məqsədilə “Serbiya, bir ailə” adlı kütləvi aksiyanın başladığı qeyd olunmuşdu.

Parlament binası qarşısında keçirilən mitinqin payız seçkiləri ərəfəsində təşkil edildiyi bildirilir.

DenMedia.az