ABŞ-İran danışıqları yeni hərbi təhlükə fonunda davam edir
saida
ABŞ Silahlı Qüvvələri İranın nüvə proqramı üzrə danışıqlar uğursuz olacağı təqdirdə İrana qarşı zərbələri bərpa etməyə hazırdır.
Bunu ABŞ-ın müharibə naziri, Pentaqon rəhbəri Pit Heqset Sinqapurda keçirilən “Şanqri-La” beynəlxalq təhlükəsizlik forumunda çıxışı zamanı bildirib.
Heqset qeyd edib ki, cümə günü ABŞ Prezidenti Donald Trampla danışıb. Nazirinin sözlərinə görə, administrasiya İran öz nüvə ambisiyalarına məhdudiyyətləri qəbul etməzsə, danışıqlardan çıxmağa hazırdır.
Pentaqon rəhbəri bildirib ki, söhbət zamanı Tramp ona istənilən razılaşmanın “yaxşı, hətta əla” olacağını deyib. Prezident əlavə edib ki, əgər İran nüvə silahı əldə etməyəcəyinə zəmanət verən “əla razılaşma” imzalamaq istəmirsə, o zaman “solunda duran adamla” məsələni həll etməli olacaq. Heqsetin sözlərinə görə, Tramp bununla məhz müharibə nazirini nəzərdə tutub.
“Biz buna artıqlaması ilə qadirik”,
deyə Heqset hərbi əməliyyatların mümkün bərpasından danışarkən bildirib.
O əlavə edib ki, ABŞ-ın ehtiyatları həm bölgədə, həm də dünyanın digər yerlərində belə bir ssenari üçün kifayət qədər uyğundur.
Pentaqon rəhbərinin açıqlaması Trampın administrasiya üzvləri ilə Situasiya Mərkəzində keçirdiyi müşavirədən bir neçə saat sonra səslənib. Həmin müşavirədə İranla danışıqlarda növbəti addımlar müzakirə olunub.
