Bakı razılaşdı, Tramp elan etdi: Avropanın mövqeyini dəyişdirən hadisə – Yanvarda…

Azərbaycan xarici siyasətdə son illərdə mühüm uğurlar əldə edib. Xüsusən İkinci Qarabağ müharibəsindən sonra Avropa İttifaqı (Aİ) və onun təsisatları ilə münasibətlərdə yaranmış gərginlik tədricən aradan qalxmaqdadır.

Avropa Şurası və Avropa Parlamentinin ölkəmizə qarşı qəbul etdiyi birtərəfli qətnamələr, eləcə də Azərbaycan nümayəndə heyətinin mandatının təsdiqlənməməsi ikitərəfli münasibətlərdə böhrana səbəb oldu. Lakin son aylarda müşahidə olunan diplomatik fəallıq, xüsusən Prezident İlham Əliyevin Avropa Siyasi Birliyinin Kopenhagen sammitində iştirakı və liderlərlə keçirdiyi görüşlər bu böhranın tədricən arxada qaldığını deməyə əsas verir.

DenMedia.az xəbər verir ki, bu barədə Globalinfoya-a danışan politoloq Məhəmməd Əsədullazadə bildirib ki, Fransa ilə münasibətlərdə uzunmüddətdir mövcud olan gərginlik Kopenhagendə iki ölkə liderinin nümayəndə heyətləri səviyyəsində apardığı görüşün ardınca yumşalma istiqamətinə yönəlib:

“Eyni zamanda, İtaliyanın Azərbaycanla bağlı məsələlərdə dəstəyi də bu yaxınlaşmanı gücləndirir. Avropa İttifaqı Cənubi Qafqazda Azərbaycanın formalaşdırdığı yeni geosiyasi nizamdan iqtisadi və nəqliyyat maraqları üçün faydalanmaq niyyətindədir. Ölkəmiz əsasən Çinlə quru nəqliyyat əlaqələrinin, eləcə də Mərkəzi Asiyanın enerji resurslarının Avropaya daşınmasının əsas tranzit xətti kimi ön plana çıxır.

Digər tərəfdən, ABŞ Prezidenti Donald Trampın Cənubi Qafqaza artan diqqəti və Orta Dəhlizin əsas hissəsi olan TRİPP (Zəngəru dəhlizi-red.) marşrutunun elan edilməsi Avropanı regionda daha fəal siyasət yürütməyə vadar edib. Bu proses fonunda Aİ-nin Bakı ilə münasibətlərdə yeni mərhələyə keçidi real görünür. 2026-cı ilin yanvar ayında Azərbaycanın Avropa Şurasında səsvermə hüququnun bərpa olunması mümkündür”.

Məhəmməd Əsədullazadə

Politoloq xatırladıb ki, artıq Azərbaycanla Ermənistan arasında sülh müqaviləsinin mətni paraflanıb:

“Avropa İttifaqı üçün bu, regional sabitliyə və enerji təhlükəsizliyinə xidmət edir, Azərbaycan üçün isə Avropa ilə siyasi və iqtisadi əlaqələrin dərinləşməsi baxımından əhəmiyyətlidir.

Azərbaycan–Avropa münasibətləri qarşılıqlı maraqlar üzərində formalaşan və keyfiyyətcə yeni mərhələyə qədəm qoyan strateji əməkdaşlıq xəttinə çevrilir. Bu vəziyyət rəsmi Bakının çoxvektorlu xarici siyasətinin effektivliyini nümayiş etdirir. Avropa üçün Azərbaycan yalnız enerji tədarükçüsü deyil, həm də Cənubi Qafqazda sabitlik yaradan güc mərkəzidir”.