Qarabağda əbədi bağlanmış “kitab” – Prezident dünyaya mesaj verdi
nizami
Prezident İlham Əliyev Qarabağa növbəti səfərini həyata keçirib. Dövlət başçısının bu səfəri regionda aparılan genişmiqyaslı bərpa və quruculuq işlərinin gedişi ilə yerində tanış olmaq, həyata keçirilən layihələrin icrasını nəzarətdə saxlamaq və yeni sosial-iqtisadi təşəbbüslərin təməlini qoymaq məqsədi daşıyır. Səfər çərçivəsində Prezident İlham Əliyev işğaldan azad eidlən ərazilərə qayıdan sakinlərlə görüşüb və mühüm açıqlamalar verib. Prezident Qırmızı Bazar, Hadrut qəsəbələrinin və Sos kəndinin sakinləri ilə görüşdə bildirib ki, separatçılığın kitabı bağlandı və Azərbaycan tam suverenliyini bərpa etdi. “Doğma Qarabağ torpağında artıq gəlib yerləşdiniz. Burada bir neçə kəndin sakinləri görüşə gəlib. Bu gün bir neçə kənddə olmuşam, sabah da davam edəcək. Bütün Qarabağ artıq tam nəzarət altındadır və bildiyiniz kimi, bu ərazi iki il bundan əvvəl işğalçılardan azad edildi. Elə bu günlərdə sentyabrın 19-20-də şanlı Ordumuz separatçılığa son qoydu. Onunla da separatçılığın kitabı bağlandı və Azərbaycan tam suverenliyini bərpa etdi. “Böyük Qayıdış” Proqramı da uğurla icra edilir. Biz təqribən iki aydan sonra tarixi Zəfərimizin beşillik yubileyini qeyd edəcəyik.
Son beş ilin tarixi Zəfər tarixidir, şanlı tariximizdir və şadam ki, siz artıq öz doğma dədə-baba torpağınıza gəlmisiniz, yerləşmisiniz. Sizin üçün burada şərait yaradılıb, evlər tikilib, təmir edilib. Bütün şərait var – su, qaz, elektrik, istilik, məktəb, tibb məntəqəsi, yollar. Ən önəmlisi bura doğma Qarabağ diyarıdır. Gözəl mənzərəli yerlərdir, hər tərəf dağ, meşə, bulaq, su da boldur. Yəni, burada, sadəcə olaraq, rahat yaşamaq, qurub-yaratmaq, uşaqları böyütmək, onlara yaxşı tərbiyə vermək üçün bütün şərait var. Yəni, artıq Azərbaycan xalqı bundan sonra sülh içində yaşayacaq”, – dövlət başçısı deyib.
Politoloq Turan Rzayev DenMedia.az-a açıqlamasında deyib ki, Prezident İlham Əliyevin “separatçılığın kitabı bağlandı” fikri təkcə daxili auditoriyaya deyil, həm də beynəlxalq ictimaiyyətə ciddi mesajdır. Belə ki, lokal antiterror tədbirləri nəticəsində Azərbaycanın Qarabağda qalan son separatçı ünsürləri də zərərsizləşdirməsinin ardından faktiki olaraq yeni reallıqlar yarandı. Nəticədə bölgədəki qanunsuz silahlı birləşmələr tərk-silah edildi və Azərbaycan dövlətinin hüquq-mühafizə orqanları suveren ərazidə tam fəaliyyətə başladı.
Bu hadisə yalnız hərbi deyil, eyni zamanda diplomatik və hüquqi baxımdan da dönüş nöqtəsi hesab olunur. Azərbaycan beynəlxalq hüquqa əsaslanaraq öz suverenliyini bərpa edib və bu prosesdə ərazisində başqa bir “siyasi” rejimin, paralel “qurum”un yaşamasına son qoyub.
Prezident İlham Əliyevin çıxışında “Böyük Qayıdış” Proqramının uğurla davam etməsini xüsusi vurğuladı. Artıq azad edilmiş torpaqlarda müasir infrastrukturun qurulması, ağıllı kənd konsepsiyasının tətbiqi, yaşayış evlərinin, məktəblərin, tibb məntəqələrinin tikintisi bu qayıdışın real nəticələridir. Qarabağa qayıdan sakinlərin sosial rifahı üçün bütün zəruri şərait yaradılıb və bu, dövlətin dayanıqlı inkişaf və sabitlik siyasətinin bariz nümunəsidir.
Hadrut, Qırmızı Bazar və Sos kəndi sakinlərinin doğma torpaqlarına qovuşması, həm mənəvi, həm də siyasi baxımdan Azərbaycanın zəfərinin ən önəmli nəticələrindən biridir. Prezidentin “siz artıq öz doğma dədə-baba torpağınıza gəlmisiniz” fikri, həm də 30 illik həsrətin bitdiyinin rəmzidir.
Prezident İlham Əliyevin Qarabağ səfəri və bu səfər zamanı səsləndirdiyi fikirlər göstərir ki, Azərbaycanın post-münaqişə dövrü yüksək strateji planlama və ardıcıl siyasi iradə ilə idarə olunur. Qarabağ artıq münaqişə zonası deyil, inkişaf, yenidənqurma və sabitlik mərkəzinə çevrilməkdədir.
Prezidentin bu səfəri və verdiyi bəyanatlar göstərir ki, Azərbaycan dövlətinin suverenliyi artıq tam şəkildə təmin olunub və ölkənin siyasi xəritəsində heç bir qaranlıq nöqtə qalmayıb. Qarabağda separatçılığa son qoyulması yalnız Azərbaycan üçün deyil, Cənubi Qafqaz regionunda da uzunmüddətli sülh və təhlükəsizliyin təmin olunmasına yönəlmiş strateji addımdır.
