İranlı deputatdan Zəngəzur AÇIQLAMASI: “Gərginlik yaranır”

İran parlamentinin Milli Təhlükəsizlik və Xarici Siyasət Komissiyasının sədri İbrahim Əzizi “Snn.ir” portalına müsahibəsində Zəngəzur dəhlizi məsələsinin Tehranın gündəmində xüsusi əhəmiyyət daşıdığını bildirib.

DenMedia.az xəbər verir ki, Əzizi  Zəngəzur dəhlizi təkcə Azərbaycanın və ya Ermənistanın maraqları ilə bağlı mövzu olmadığını, həm də bütün region üçün mühüm geostrateji çəkisi olan bir məsələ olduğunu dilə gətirib:

“Zəngəzur dəhlizi İran üçün strateji əhəmiyyət kəsb edir və bu mövzuya öz çəkisi verilməlidir. Bu, ölkəmizin iqtisadi, siyasi və təhlükəsizlik maraqları ilə birbaşa bağlıdır”, – deyə komissiya sədri vurğulayıb.

İranlı deputat həmçinin qeyd edib ki, bölgədə baş verən proseslərə ABŞ-ın yanaşması qeyri-səmimidir və Vaşinqtonun əsas hədəfi regionda sabitlik yaratmaq yox, əksinə, gərginliyi artırmaqdır:

“Amerikalılar nə azərbaycanlılara, nə də ermənilərə rəğbət bəsləyirlər. Onların siyasəti bölgədə gərginlik yaratmaqdan ibarətdir. Bu gərginlikdən isə ən çox bölgə ölkələri zərər görür”, – Əzizi əlavə edib.

O, İranın prinsipial mövqeyinin dəyişməz qaldığını, region dövlətlərinin öz maraqlarını qorumaq üçün bir-birinə qarşı deyil, əməkdaşlıq yolu ilə hərəkət etməsinin vacibliyini vurğulayıb. Globalinfo.az