Səkkiz döyüş gəmisi əraziyə yaxınlaşır: Regionda gərginlik artdı

ABŞ Cənubi Amerika sahillərinə səkkiz hərbi gəmi göndərib.

Denmedia.az xəbər verir ki, bu addım Donald Tramp administrasiyasının narkotik kartelinin rəhbəri olmaqda ittiham etdiyi və başına 50 milyon dollar mükafat qoyduğu Venesuela Prezidenti Nikolas Maduroya qarşı hərbi təzyiqlərin güclənməsi ilə bağlı ehtimalları artırıb.

“Washington Post” yazır ki, ABŞ-ın bu hərbi gedişi 1994-cü ildə Haitidə və 1989-cu ildə Panamada həyata keçirilən rejim dəyişikliyi əməliyyatlarını xatırladır. Pentaqon rəsmiləri isə gəmilərin Latın Amerikasında gücləndirilmiş narkotik ticarəti ilə mübarizə əməliyyatı çərçivəsində göndərildiyini açıqlayıb.

Donanmaya üç esmines, iki desant gəmisi, bir amfibiya hücum gəmisi, bir kreyser və bir sahil döyüş gəmisi daxildir. Eyni zamanda ABŞ Sahil Mühafizəsi və hüquq-mühafizə qurumlarının nümayəndələri də əməliyyata cəlb olunub. ABŞ hərbi dəniz qüvvələri gəmilərin dəqiq harada yerləşdirildiyini açıqlamasa da, onların Karib dənizində patrulda olduğunu bildirib.

Məsələ ilə bağlı Ağ Ev rəsmi açıqlama verməkdən imtina edib. Venesuela müxalifəti isə donanmanın bölgəyə göndərilməsini Tramp administrasiyasının Maduroya təzyiq strategiyasının bir hissəsi kimi qiymətləndirib.