Məktəblər bağlana bilər – xəstəlik sürətlə artır: “Distant təhsilə keçilməsə…”

Hazırda uşaqlar arasında müxtəlif yoluxucu xəstəliklərin sürətlə yayılması valideynləri və cəmiyyəti ciddi şəkildə narahat edir. Xüsusilə məktəblərdə sıx təmasın mövcudluğu xəstəliklərin daha geniş miqyasda yayılması riskini artırır. Bu fonda səhiyyə mütəxəssislərinin də müvəqqəti olaraq distant təhsilə keçidin zəruriliyini vurğulaması məsələnin aktuallığını daha da ön plana çıxarır.

Belə olan halda, şagirdlərin sağlamlığını qorumaq üçün təhsildə çevik yanaşma tətbiq edilərək, qısa müddətlik distant təhsilə keçmək mümkün ola bilərmi?

Denmedia.az xəbər verir ki, bu barədə Globalinfo.az-a danışan təhsil eksperti Sona Əliyeva deyib ki, hazırda uşaqlar arasında xəstəliklərin sürətlə yayılması artıq nə gizlədiləcək, nə də ötürüləcək məsələ deyil.

Sona Əliyeva

Ekspertin fikrincə, bu vəziyyətdə susmaq da, “gözləyək görək” demək də məsuliyyətsizlikdir:

“Burada söhbət distant təhsili ideallaşdırmaqdan yox, uşaqların sağlamlığını qorumaqdan gedir. Xəstə uşaq məktəbə gələndə təkcə özü üçün yox, bütün sinif üçün risk yaradır. Bir neçə günün içində problem böyüyür, yoluxanların sayı artır, dərslər pozulur, valideynlər narahatlıq keçirir. Bunun adı idarəetmə deyil, hadisələrin arxasınca sürünməkdir. Texniki imkanların olduğu bir dövrdə “mümkün deyil” demək inandırıcı səslənmir. Distant təhsil fövqəladə vəziyyətlər üçün var. Xəstəlik yayılırsa, məktəb müvəqqəti onlayn rejimə keçə bilər. Bu, təhsildən qaçmaq yox, təhsili və uşağı qorumaqdır”.

Sona Əliyeva deyib ki, aidiyyəti qurumlar vəziyyəti ciddiyə almalıdırlar:

“Hər şeyi ümumiləşdirib vaxt itirmək əvəzinə, bölgələr üzrə qərar verilməlidir. Edpidemiya riski olan yerlərdə dərhal tədbir görülməlidir. Uşaqların sağlamlığı statistikaya, hesabatlara qurban verilə bilməz. Sağlam olmayan uşaqdan nə dərs, nə nəticə, nə də gələcək gözləmək olar. Təhsil sisteminin əsas vəzifəsi əvvəlcə uşağı qorumaqdır, daha sonra isə tədris proqramını. Bu gün atılmayan qərarın qiymətini sabah uşaqlar, valideynlər və müəllimlər ödəyəcək”.