Damaqları fəth edən diplomatiya: NATO liderləri türk mətbəxinin sehrinə düşdü - FOTO
saida
Ankarada keçirilən NATO Liderlər Zirvəsi təkcə siyasi və hərbi qərarlarla deyil, dünya liderlərinə təqdim olunan xüsusi kulinariya diplomatiyası ilə də diqqət çəkib.
Zirvə şərəfinə təşkil olunan axşam yeməyində türk mətbəxinin qədim ənənələrini və zəngin coğrafiyasını əks etdirən xüsusi menyu təqdim edilib. Gecə boyunca liderlər Anadolu bölgələrindən gətirilən yerli məhsullarla hazırlanmış yeməklərlə tanış olublar.
Ənənəvi başlanğıclar və Anadolu dadları
Axşam yeməyi türk qonaqpərvərliyinin rəmzlərindən sayılan daş sobada bişirilən pide və zeytun yağında hazırlanmış tərəvəz qovurması ilə başlayıb.
Menyuda diqqət çəkən əsas məqamlardan biri isə Trabzon kərə yağı ilə Hizan qarakovan balının birlikdə təqdim edilməsi olub. Bu seçim Şərqi Anadolu ilə Qara dəniz bölgəsinin dadlarını eyni süfrədə birləşdirib.
Başlanğıc menyusu Egey və Aralıq dənizi bölgələrinin təzə göyərtiləri ilə hazırlanmış, hisli aroması ilə seçilən Denizli qatığı ilə tamamlanıb.
Kayseri mantısı müasir təqdimatda
Əsas yeməkdən əvvəl təqdim edilən isti seçimlər arasında türk mətbəxinin dünyada tanınan xəmir yeməklərindən biri — Kayseri mantısı xüsusi yer tutub.
Bu ənənəvi yemək aşpazların müasir yanaşması ilə fərqli formada hazırlanıb. Mantı Denizli qatığı və coğrafi göstəricili hisli Ayaş tomat məcunu ilə təqdim edilib.
Qeyri-adi hisli və dərin dad çalarlarının xarici liderlər tərəfindən yüksək qiymətləndirildiyi bildirilir.
Dənizdən və torpaqdan gələn əsas yeməklər
Əsas yemək seçimində həm dəniz məhsullarına, həm də ət yeməklərinə üstünlük verən qonaqlar üçün xüsusi menyu hazırlanıb.
Liderlərə ilk seçim kimi dəniz levreki təqdim olunub. Qırmızı ətə üstünlük verənlər üçün isə uzun müddət zəif odda bişirilmiş, yumşaq teksturası ilə seçilən mal qabırğası verilib.
Yeməyi müşayiət edən qarnirlər də türk mətbəxinin yerli məhsullara verdiyi önəmi göstərib. Tarama, Urlanın məşhur sakız ənginarı və Tokat üzüm yarpağı ilə hazırlanan üçlü təqdimat Egey və Orta Anadolu dadlarını bir araya gətirib.
Gecənin ən çox danışılan yeməklərindən biri isə yanıq Trabzon kərə yağı, közlənmiş badımcan və quzugöbəyi göbələyi ilə zənginləşdirilmiş firik plovu olub.
Firik buğdasının hisli aroması menyuda Anadolu torpaqlarının dərinliyini hiss etdirən əsas elementlərdən biri kimi təqdim edilib.
Şirin final: Sütlü Nuriye və Maraş dondurması
Tarixi gecə türk şirniyyat ənənəsinin zərif nümunələri ilə başa çatıb.
Liderlərə şərbətli şirniyyatlar arasında daha yüngül dadı ilə seçilən Sütlü Nuriye təqdim edilib. Bu deserti dünyaca məşhur Maraş dondurması, müasir kulinariya texnikası ilə hazırlanmış Antep püstəsi köpüyü və təravətli berqamot aroması tamamlayıb.
Ankaradakı zirvə bununla yalnız diplomatik münasibətlərin deyil, həm də türk mətbəxinin minillik irsinin, yerli istehsalçıların əməyinin və müasir türk aşpazlarının yaradıcılığının dünya səhnəsinə çıxarıldığı gecə kimi yadda qalıb.
