Pentaqon sənədləri açıqlasa da, amerikalılar UFO-larla bağlı şübhələrini qoruyur - FOTO
saida
ABŞ-da aparılan yeni ictimai rəy sorğusu amerikalıların böyük hissəsinin federal hökumətin UFO-larla bağlı bildiyi bütün məlumatları açıqlamadığına inandığını göstərib.
CBS News telekanalının 2-4 iyun tarixlərində keçirdiyi sorğu ABŞ ictimaiyyətinin dünyadankənar həyat və “tanımlanmayan uçan cisimlər” mövzusuna münasibətini araşdırıb. Nəticələr göstərir ki, cəmiyyətdə bu sahədə rəsmi açıqlamalara qarşı ciddi şübhə var.
Sorğunun nəticələrinə görə, iştirakçıların 63 faizi Yer kürəsindən başqa planetlərdə də ağıllı həyat formalarının mövcud olduğuna inanır.
Federal hökumətin UFO-larla bağlı nə dərəcədə şəffaf davrandığına dair suala cavablar isə daha diqqətçəkəndir. Respondentlərin 84 faizi hökumətin bu cisimlərlə bağlı ictimaiyyətə açıqladığından daha çox məlumata sahib olduğunu düşünür. Dövlətin əlindəki bütün məlumatları açıq şəkildə paylaşdığına inananların payı isə cəmi 16 faizdir.
Araşdırmada iştirakçılara “Bəşəriyyət dünyadankənar ağıllı varlıqlarla nə zaman əlaqə quracaq?” sualı da verilib. Cavablara görə, respondentlərin 21 faizi belə bir təmasın artıq baş verdiyini düşünür. 46 faiz bu əlaqənin gələcəkdə nə vaxtsa qurulacağına inanır, 33 faiz isə dünyadankənar həyat formaları ilə heç vaxt əlaqə yaradılmayacağını hesab edir.
Bu müzakirələr fonunda ABŞ Müdafiə Nazirliyi — Pentaqon bir müddət əvvəl UFO və tanımlanmayan hava fenomenləri ilə bağlı yeni rəsmi sənədlərin 8 mayda yayımlandığını açıqlamışdı.
Nazirliyin yaratdığı rəsmi internet səhifəsində mülki və hərbi personalın birbaşa müşahidələri, onlarla video yazı, araşdırma hesabatları və rəsmi yazışmalar ictimaiyyət üçün əlçatan edilib.
Buna baxmayaraq, son sorğu göstərir ki, amerikalıların böyük hissəsi federal qurumların hələ də bəzi həqiqətləri gizlətdiyi qənaətindədir.
