Hörmüz böhranı dərinləşir: Vaşinqton və Tehran qarşı-qarşıya

Vaşinqton və Tehran arasında Pakistanın vasitəçiliyi ilə İslamabadda keçirilən danışıqlar dalana dirənib, bu barədə Financial Times danışıqlarda iştirak edən mənbələrə istinadən xəbər verir. Əsas mübahisə mövzusu Hörmüz boğazına nəzarət məsələsi olub.

Məlumata görə, nümayəndə heyətləri tədbir zamanı mövqelərini əks etdirən yazılı sənədlərlə mübadilə aparıblar. Tehran boğaz üzərində nəzarətin tanınmasını, ABŞ qüvvələrinin regiondan çıxarılmasını, uranın zənginləşdirilməsi hüququnu və hücum etməmə təminatlarını tələb edir.

Vaşinqton isə boğazın dərhal və təhlükəsiz şəkildə gəmiçilik üçün açılmasını tələb edir. Hələlik tərəflər kompromisə gələ bilməyiblər.

Vəziyyət aprelin 8-də əldə olunan iki həftəlik atəşkəsdən sonra daha da mürəkkəbləşib. Tərəflər bir-birini pozuntularda ittiham edir: Tehran İsrailin Livanda qanunsuz hərəkətlərini göstərir, ABŞ isə İranın gəmilərin keçidi üçün ödəniş tətbiq etdiyini bildirir. Bundan əlavə, İranın zərərsizləşdirə bilmədiyi gəmiəleyhinə minalar təhlükəsi də qalmaqdadır.

DenMedia.az