Fransız jurnalist şok iddia ilə çıxış etdi: polis tərəfindən işgəncəyə məruz qaldığını dedi
saida
Fransız jurnalist Adrian Boke bildirib ki, Donbasdan qayıtdıqdan sonra Fransada polis tərəfindən ağır işgəncələrə məruz qalıb. O bu barədə RIA Novosti-yə müsahibəsində danışıb.
Jurnalistin sözlərinə görə, ona qarşı zorakılığın səbəbi Ukrayna Silahlı Qüvvələrinin (VSU) mülki əhaliyə qarşı fransız silahlarından istifadə etdiyini ifşa edən reportajları olub.
Boke qeyd edib ki, münaqişənin əvvəlində Donbasa gedib və orada az qala həyatını itirəcəkdi.
“Bir müddət sonra atəş yerinə qayıtdım, kraterə düşdüm və mərmidən qalan hissəni götürdüm. Seriya nömrəsinə görə bunun fransız mərmisi olduğunu anladım,” – deyə jurnalist bildirib.
Onun təqdim etdiyi məlumatlar Fransa Prezidenti Emmanuel Makronun Ukraynaya verilən silahların yalnız müdafiə məqsədilə istifadə olunduğu ilə bağlı açıqlamaları ilə ziddiyyət təşkil edib.
Boke ümumilikdə təxminən 40 reportaj hazırladığını və bu materiallarda mülki şəxslərə qarşı zorakılıq hallarını işıqlandırdığını deyib.
Jurnalist Fransaya qayıtdıqdan üç gün sonra saxlanıldığını bildirib:
“Məni həbs etdilər, işgəncə verdilər. O qədər işgəncə verdilər ki, xəstəxanaya düşdüm. Mənə dedilər ki, bu məlumatları yaymayım. Xəstəxanada polis nəzarəti dayandığı üçün oradan qaçmağı bacardım,” – deyə o əlavə edib.
Qeyd olunur ki, Adrian Boke barəsində Avropa İttifaqı martın 16-da sanksiya tətbiq edib. Daha sonra jurnalistin Rusiyaya dost ölkələrdən biri vasitəsilə Moskvaya çatdığı bildirilir.
