Maduronun həbsxanadakı həyatı: kiçik kamera, qandallar və təcrid
saida
Venesuela prezidenti Nikolas Maduro ABŞ-da həbsdə sərt təcrid şəraitində saxlanılır.
Məlumata görə, ABŞ qüvvələri tərəfindən Karakasda saxlanılaraq Nyu-Yorka aparılan Maduro hazırda Bruklində yerləşən Metropolitan Detention Center (MDC) müvəqqəti saxlanma mərkəzində yerləşdirilib. Onun həbsdəki vəziyyəti barədə məlumatı hüquq müdafiəçisi İvan Melnikov açıqlayıb.
Melnikovun sözlərinə görə, Maduro təxminən 2×2,5 metr ölçülü kiçik kamerada saxlanılır və gücləndirilmiş təhlükəsizlik rejimi altında təcrid olunub. Kameranın pəncərələri qalın barmaqlıqlarla bağlanıb və qaranlıqlaşdırılıb, buna görə gündüz belə içəridə demək olar ki, işıq olmur.
Kamerada yalnız dəmir çarpayı, unitaz və lavabo yerləşir. Bəzən kiçik masa da ola bilər. Bütün avadanlıq anti-vandal sistemlə döşəməyə möhkəm bərkidilib.
Hüquq müdafiəçisi bildirib ki, Maduronun təhlükəsizlik səbəbilə demək olar ki, heç vaxt gəzintiyə çıxarılmaması ehtimalı var. Çünki həbsxanadakı gəzinti həyətləri ümumi istifadə üçündür və bu da təhlükəsizlik riski yarada bilər.
Bildirilir ki, duş qəbuluna həftədə bir dəfə icazə verilir, qidalanma isə olduqca sadədir.
Səhər yeməyində adətən bir neçə tost və ya sendviç verilir. Nahar və şam yeməyində isə əsasən lobya və az miqdarda ət təqdim olunur.
Həbsxanada əlavə qida almaq mümkündür, lakin bunun üçün məhbusun şəxsi vəsaiti olmalıdır.
Melnikovun sözlərinə görə, belə statuslu məhbusların hərəkəti də ciddi nəzarət altındadır.
Onlar adətən qandallar, ayaq zəncirləri və xüsusi kəmər zəncirləri ilə hərəkət etdirilir.
Görüşlərə icazə verilərsə, həftədə bir dəfə və maksimum 45 dəqiqə davam edə bilər.
