Uşaqlar üçün risk – anonim çat tətbiqləri App Store-dan silinir

Apple App Store üçün moderasiya qaydalarını sərtləşdirib və xəbərdarlıq etmədən silinə bilən tətbiqlərin siyahısını genişləndirib. Şirkətin rəsmi saytında bildirildiyinə görə, təsadüfi və anonim ünsiyyət xidmətləri artıq rəsmi şəkildə qadağandır.

Dəyişikliklər təhlükəsizlik və istifadəçi məzmunu bölməsinə aiddir. Apple vurğulayır ki, bu tip tətbiqlər intellektual hüquqların pozulmasından tutmuş anonim zorakılıq və təhqirə qədər ciddi risklər yaradır. Bu səbəbdən platforma şikayət mexanizmlərinin, aktiv moderasiyanın və arzuolunmaz məzmunun filtrasiyasının olmasını tələb edir.

Yeni redaksiyada Apple açıq şəkildə qeyd edir ki, əsasən pornoqrafik məzmun üçün istifadə olunan servislər, Chatroulette tipli tətbiqlər, anonim və təsadüfi çatlar, eləcə də real insanların obyektləşdirilməsi, fiziki təhdidlər və təqib hallarına yol açan platformalar App Store-da yer almamalı və əvvəlcədən xəbərdarlıq edilmədən silinə bilər.

Siyasətin sərtləşdirilməsi 2025-ci ildə qəbul edilən qərarlarla əlaqələndirilir: Apple və Google, Avstraliya tənzimləyicisinin anonim platformaların uşaqlar üçün riskləri barədə xəbərdarlığından sonra OmeTV videoçatını mağazalardan çıxarmışdı.

DenMedia.az