Əyalət qərarı: Britaniya tacı Kvebek gerbindən çıxarılır

Kanadanın Kvebek əyalətinin hökuməti əyalətin gerbindən Britaniya tacını götürmək qərarına gəlib. Bu barədə X sosial şəbəkəsində regionun ədliyyə naziri Simon Jolin-Barrette məlumat verib.

“Biz Kvebekin gerbindən tacın götürüləcəyini elan etdik. Kvebek sakinlərinin böyük əksəriyyəti Britaniya monarxiyasına heç bir bağlılıq hiss etmir”, — deyə o yazıb.

Nazirin sözlərinə görə, gerbin yenilənmiş variantı Kvebek kimliyini daha yaxşı əks etdirir.

Kvebekin gerbi qalxan formasındadır. Yuxarı hissədə Fransa ilə əlaqəni simvolizə edən üç qızılı zanbaq, mərkəzdə Britaniya irsini xatırladan qızılı şir, aşağı hissədə isə əyalətin Kanadanın tərkibində olduğunu göstərən üç ağcaqayın yarpağı təsvir olunub. Qalxanın altında “Mən xatırlayıram” yazısı yer alır. Tac isə gerbin yuxarı hissəsində yerləşirdi.

Elan olunan dəyişikliklərə qədər bütün kompozisiya Tüdorlar tacı ilə tamamlanırdı.

DenMedia.az