Ağ Evdən sərt qərar: fentanil KQS kimi təsnif olundu

ABŞ prezidenti Donald Tramp “qanunsuz fentanil və onun əsas kimyəvi prekursorlarını” kütləvi qırğın silahı (KQS) kimi təsnif edən fərman imzalayıb.

Ağ Ev tərəfindən yayımlanan fərmanda qeyd olunur ki, əsasən mütəşəkkil cinayət şəbəkələri tərəfindən həyata keçirilən fentanilin istehsalı və yayılması ABŞ-ın milli təhlükəsizliyinə təhdid yaradır, həmçinin yarımkürədə və sərhədlərdə qanunsuzluğu gücləndirir.

“Bununla mən qanunsuz fentanili və onun əsas kimyəvi prekursorlarını kütləvi qırğın silahı elan edirəm,” — deyə Tramp bildirib.

Sənədə əsasən, ABŞ-ın baş prokuroru Pam Bondi fentanilin qanunsuz dövriyyəsi ilə bağlı dərhal istintaq və məhkəmə təqibinə başlamalıdır. Dövlət katibi Marko Rubio və maliyyə naziri Skott Bessent isə qanunsuz fentanilin və onun əsas kimyəvi maddələrinin istehsalı, yayılması və satışı ilə məşğul olan və ya bunu dəstəkləyən şəxslərə aid aktivlər və maliyyə institutları ilə bağlı qüvvədə olan qanunvericiliyə uyğun tədbirlər görməlidir.

Denmedia.az