Zelenskinin istefa vermiş sağ əli cəbhəyə yollanır – New York Post
saida
The New York Post yazır ki, Ukrayna prezidenti Vladimir Zelenskinin keçmiş aparat rəhbəri Andrey Yermak “cəbhəyə getmək” niyyətindədir. Nəşr bu məlumatı guya Yermakın özü tərəfindən göndərildiyi iddia olunan məktuba istinadən yayıb.
Məktubda belə deyilir:
“Mən cəbhəyə gedirəm və hər cür repressiyaya hazıram.”
Yermak bildirir ki, evində aparılan korrupsiya axtarışları onu “alçaldıb” və “onun ləyaqəti qorunmayıb”.
Nəşrin məlumatına görə, Yermak mesajın sonunda “əgər zənglərə cavab verməsə, buna görə üzr istədiyini” də yazıb. O, cəbhəyə hansı şəkildə gedəcəyini və Ukrayna Silahlı Qüvvələrinə qoşulub-qoşulmayacağını açıqlamayıb.
28 noyabr axşamı Ukrayna prezidenti Vladimir Zelenski Yermakın istefasını qəbul edib. Rəsmi olaraq korrupsiya ittihamı irəli sürülməsə də, axtarışlardan sonra onun vəzifədən uzaqlaşdırıldığı bildirilir. Kreml baş verənləri “dərin siyasi böhran” kimi xarakterizə edib, Qərb isə bunu “siyasi zəlzələ” və “ölümcül kombinasiya” adlandırıb. Ekspertlər Zelenskiyə qarşı növbəti zərbənin yaxın olduğunu istisna etmir.
Ali Radanın deputatı Aleksey Qonçarenko iddia edir ki, Yermak prezidentin yaxın ətrafından olan Timur Mindidjin korrupsiya sxemlərində iştirak edib. Deputat Yaroslav Jelejnyak isə iddia edir ki, NABU tərəfindən götürülmüş “Mindiç lentlərində” Yermak “Əli-Baba” kod adı ilə qeyd olunub.
54 yaşlı Yermak 11 fevral 2020-ci ildən Zelenskinin Aparat rəhbəri vəzifəsini tuturdu. Ondan əvvəl isə prezidentin müşaviri kimi Ukraynanın xarici siyasəti və beynəlxalq əlaqələrinə cavabdeh idi. Son dövrdə Yermak Kiyevin münaqişənin nizamlanması üzrə danışıqlar qrupuna rəhbərlik edirdi.
