BBC-yə qarşı qalmaqal — Trampın nitqindən “saxta montaj”
saida
Britaniya Yayım Korporasiyası (BBC) video materiallarla manipulyasiya etməkdə ciddi ittihamlarla üzləşib. Telegraph qəzetinin araşdırmasına görə, Panorama proqramında ABŞ prezidenti Donald Trampın 2021-ci ilin yanvarında söylədiyi çıxış təhrif olunub.
“BBC Donald Trampın çıxışını saxtalaşdıraraq onun Kapitoli təpəsindəki iğtişaşları təşviq etdiyi təəssüratını yaradıb,” — deyə araşdırmada bildirilir.
Məlumata əsasən, 2024-cü ilin oktyabrında yayımlanan proqramda Trampın nitqi elə montaj olunub ki, guya o, tərəfdarlarını iğtişaşlara səsləyib. Montajçılar çıxışın müxtəlif hissələrini birləşdirib, aradakı təxminən bir saatlıq fərqi kəsiblər.
Bu da tamaşaçılarda belə bir təsəvvür yaradıb ki, prezident tərəfdarlarına “əllərindən gələni əsirgəməmələrini” deyib, halbuki o, əslində sülh yolu ilə etirazdan danışırdı.
Manipulyasiyanın başqa bir elementi — Trampın çıxışından əvvəl çəkilmiş yürüş kadrlarının proqramda onun çıxışı ilə birlikdə göstərilməsi olub.
Hadisə 2021-ci il 6 yanvar etirazları ilə bağlı mübahisələrin davam etdiyi bir dövrdə baş verib. Həmin vaxt Trampın tərəfdarları Kapitoli binasına soxulmuş, nəticədə çoxsaylı həbslər olmuşdu.
2025-ci ildə Tramp prezident səlahiyyətlərindən istifadə edərək Kapitol hadisələrinə görə məhkum edilmiş təxminən 1,5 min nəfəri əfv edib — bu, onun seçkiqabağı vədlərindən biri idi.
