Diktatorun cəlladlarına son: Pinoçet dövrü məhbusları üçün yeni qaydalar
saida
Çilinin hərbi rejim dövründə insan haqlarına qarşı cinayətlərdə təqsirli bilinən şəxslərin saxlandığı Punta Peuko adlı yüksək rejimli həbsxananın imtiyazlı statusu ləğv oluna bilər. The Guardian yazır ki, həbsxana dövlətin ümumi cəza sistemi şəbəkəsinə daxil ediləcək.
Çili prezidenti Qabriel Boric bazar ertəsi bildirib ki, Punta Peuko adi həbsxanaya çevriləcək. Məqsəd — ölkənin həddindən artıq dolmuş penitensiar sistemində yer çatışmazlığını aradan qaldırmaqdır.
Məlumata görə, bu həbsxanada saxlanılan məhbuslar tennis kortları, barbekü meydançaları, kitabxana və televiziya otaqları kimi imkanlardan yararlanırdılar — yəni, ölkənin digər zindanları ilə müqayisədə xeyli rahat şəraitdə yaşayırdılar.
Hazırda burada 141 kişi məhbus var, onların orta yaşı 80-ə yaxındır. Əksəriyyəti diktator Auqusto Pinoçet dövründə fəaliyyət göstərmiş kəşfiyyat və gizli polis əməkdaşlarıdır. Onların arasında Miqel Krasnoff da var — o, insan haqlarına qarşı çoxsaylı cinayətlərə görə 1000 ildən artıq həbs cəzası alıb.
Bu xüsusi həbsxana 1995-ci ildə Pinoçetin gizli xidmət rəhbəri Manuel Kontreras və briqada generalı Pedro Espinosa üçün tikilmişdi. Son illər bir neçə dəfə onun bağlanması təşəbbüsləri irəli sürülüb.
Hazırda müəssisə ərazisində yenidənqurma işləri aparılır — keçmiş idman meydançalarından birində idarə binası və nəzarət məntəqəsi tikilir. Yeni məhbusların 2026-cı ilin əvvəlində ora köçürülməsi planlaşdırılır. Bundan sonra müəssisə Tiltyl həbsxanası adlandırılacaq.
