Suriya 14 il sonra ilk parlament seçkilərinə hazırlaşır

Suriya, Bəşər Əsəd rejiminin devrilməsindən sonra ilk dəfə olaraq 5 oktyabrda Xalq Şurasına – ölkənin təkpalatalı parlamentinə – seçkilər keçirəcək. Yeni qanunverici orqanın formalaşması 40 illik diktatura və 14 illik vətəndaş müharibəsindən sonra baş tutur, DW yazır - DenMedia.az xəbər verir.

Seçkilər adi üsulla olmayacaq: siyasi partiyalar iştirak etmir, seçki plakatları yoxdur. Səsvermə müxtəlif komitələr və seçki kollegiyaları vasitəsilə aparılacaq, buna görə də bu seçkilər “bilvasitə” adlanır. Hökumətin açıqlamasında bildirilir ki, Suriya reallıqları milyonlarla məcburi köçkün, sənədsiz və hüquqi zəif struktur səbəbindən ənənəvi seçkilərə imkan vermir.

Seçkilər bir neçə mərhələdə keçiriləcək: iyunda keçid hökuməti birbaşa Xalq Şurasına seçkiləri nəzarət edəcək 11 üzvü yüksək komitəyə təyin edib. Komitə isə ölkənin 62 seçki dairəsində alt-komitələr yaradıb və bəzi dairələrdə əhali sayına görə bir neçə yer olacaq.