"Avropa üçün Rusiya təhlükəsi yaxınlaşır, Putinin ölümü belə bu prosesi dayandırmayacaq"

"Rusiyada yeni səfərbərlik istisna edilmir, Avropa mümkün müharibəyə hazırlaşır..."

Rusiya 1980-ci illərdən bəri ən böyük silahlanma proqramını işə salıb. Bu proqram 2037-ci ilə qədər nəzərdə tutulub və əsas mərhələsi 2030-cu ilə qədərdir.

DenMedia.az xəbər verir ki, bu barədə Ukrayna hərbi kəşfiyyatının rəhbəri Kirill Budanov bəyan edib. Məlumatı "24tv.ua" nəşri yayıb.

Moskvanın 1,2 trilyon dollarlıq hərbi proqramı

Budanov qeyd edib ki, təxminən 1,2 trilyon dollar məbləğində maliyyələşdirilən bu plan sırf modernləşmə və yeni silah sistemlərinin hazırlanmasına yönəlib. Budanovun sözlərinə görə, bu vəsait Müdafiə Nazirliyinin büdcəsi deyil, əlavə resurslardır. Onun fikrincə, Kreml 2030-cu ildən etibarən Avropa üçün real təhlükə yarada bilər. Hazırda Moskvanın NATO ölkələrinə hücumu gündəmdə deyil, amma uzunmüddətli perspektivdə bu plan istisna edilmir.

Avropada həyəcan siqnalları

Budanovun xəbərdarlıqları Qərbdə rezonans doğurub. Fransada hökumət hətta xəstəxanalara "böyük münaqişə" ssenarisi üzrə hazırlıq tapşırığı verib. Bu plana əsasən, Fransa 2026-cı ilə qədər həm öz əsgərləri, həm də müttəfiq ölkələrin yaralılarını qəbul edəcək arxa baza rolunu oynaya bilər.

NATO-nun Avropadakı qoşunlarının baş komandanı, ABŞ generalı Aleksus Qrinkyeviç isə bildirib ki, Çin və Rusiyanın paralel hücumu ehtimalı mövcuddur və 2027-ci il ciddi böhran ili ola bilər. Almaniyada da oxşar narahatlıqlar güclənir: Berlin hökumətində Baltikyanı ölkələrə hücum ehtimalı ciddi müzakirə olunur.

Yeni səfərbərlik təhlükəsi

Budanov həmçinin Rusiya daxilində yeni səfərbərlik dalğasının mümkünlüyünü də istisna etmir. 2022-ci ildəki qismən səfərbərlik cəmiyyətdə güclü narazılıq doğursa da, Kremlin hərbi maşınını dayandırmadı. Onun sözlərinə görə, yeni səfərbərlik Rusiya cəmiyyətində gərginlik yaratsa da, Moskva bundan çəkinməyəcək: "Bu, ağrılı olacaq, amma realdır. Və belə bir təhlükə, təəssüf ki, mövcuddur".

Şimal Koreya və İranın rolu

Rusiya artıq tək mübarizə aparmır. Budanov bildirib ki, hazırda Moskvanın cəbhədə istifadə etdiyi sursatların 40 faizi Şimali Koreyada istehsal olunur. KXDR həm artilleriya mərmiləri, həm də raketlər göndərir, üstəlik cəbhədə Şimali Koreya istehsalı olan texnika və hətta hərbçilər peyda olub. İran isə Rusiyaya "Shahed" tipli kamikadze dronları, həmçinin sursat istehsalı üçün nitroselüloza və barıt kimi xammal verir. Müharibənin əvvəlində İrandan alınan dronlarla edilən hücumlar onlarla idisə, indi hər zərbədə yüzlərlə aparat havaya qalxır.

Çin isə daha ehtiyatlı mövqe tutur. Pekin birbaşa silah vermir, amma ikiqat təyinatlı texnologiyalar (mülki görünsə də, hərbi məqsədlərə yararlı komponentlər) göndərərək Kremlə dolayı dəstək verir. Rusiyanın 1,2 trilyon dollarlıq silahlanma proqramı, yeni səfərbərlik ehtimalı və Şimali Koreya ilə İranın açıq dəstəyi Avropa üçün təhlükənin yaxın illərdə artacağını göstərir.

NATO ölkələri artıq səhiyyə sistemlərindən tutmuş hərbi planlaşdırmaya qədər müharibəyə hazırlıq görür. Budanovun sözləri ilə desək, "Putinin ölümü belə bu prosesi dayandırmayacaq", çünki məsələ artıq Kremlin bütöv strateji xəttinə çevrilib. İndi əsas sual budur: Avropa bu təhdidə necə cavab verəcək?..(Moderator.az)