Ağır qəzada həlak olan Məryəmin orqanları altı nəfərə həyat verdi - VİDEO

Bir neçə gün əvvəl yol-nəqliyyat hadisəsində həyatını itirən Məryəm Əliyeva Gəncədə son mənzilə yola salınıb. Mərhumun ölümündən sonra yayılan xəbər isə demək olar ki, hər kəsi təsirləndirib. Belə ki, onun orqanlarının bağışlanması nəticəsində altı nəfər yaşamaq şansı qazanıb.

Mərhumun qohumu Nicat Əliyev qəza barədə Baku TV-yə danışıb.

"Hadisə Bakıda, Babək prospektində baş verib. Avtomobildə sərnişin kimi gedirdi. Qəza nəticəsində beyin zədəsi almışdı. Xəstəxanaya çatdırıldıqdan sonra beyin ölümü qeydə alındı. Orqan donorluğu ilə bağlı qərar ailənin, xüsusilə də valideynlərin qərarı idi. Onlara bu barədə təklif olundu və valideynlər tərəddüd etmədən razılıq verdilər.

Bu, çox ağır və çətin qərar idi. Belə acılı gündə bunu etmək heç də asan deyil. Sən demə, Məryəm də dostlarına deyirmiş ki, əgər donor ola biləcəyini bilsə, bir saniyə belə tərəddüd etməzdi.

Ailə düşündü ki, bu addımla bir neçə insan həyata qayıda bilər. Elə də oldu. Altı nəfərin həyatı xilas edildi", - o deyib.

Qeyd edək ki, mərhum Məryəm Əliyeva bloqer Nərmin Əliyevanın bacısı olub. Bu barədə bloqerin özü də məlumat verərək bacısının orqanlarının altı nəfərə həyat verdiyini bildirib.