Abşeronda genişmiqyaslı iməclik aksiyaları keçirilib-VİDEO

Abşeron rayonunun mərkəzi Xırdalan şəhəri başda olmaqla rayonun kənd və qəsəbələrində genişmiqyaslı iməclik aksiyaları ardıcıl şəkildə davam etdirilir.

Denmedia.az xəbər verir ki, Rayon İcra Hakimiyyəti başçısı Abdin Fərzəliyevin tapşırıq və tövsiyələrinə uyğun olaraq bayram günlərində aparılan bu işlər Abşeronun simasını köklü şəkildə dəyişir.

Aksiyalar çərçivəsində yol kənarları və yaşayış massivləri məişət tullantılarından təmizlənir, mövcud yaşıllıqlara aqrotexniki qulluq göstərilir, qurumuş ağaclar yeniləri ilə əvəzlənir, müxtəlif ərazilərdə yeni ağacəkmə tədbirləri həyata keçirilir. Paralel olaraq bəzi küçə və məhəllələrdə asfaltlanma işləri görülür ki, bu da həm nəqliyyatın rahatlığını, həm də şəhər estetikasını yüksəldir.

Görülən tədbirlər təkcə estetik görüntünün yaxşılaşdırılmasına deyil, eyni zamanda ərazidə ekoloji tarazlığın qorunmasına və sağlam yaşayış mühitinin formalaşdırılmasına xidmət edir. Təmizlənən ərazilər, bərpa olunan yaşıllıqlar və yeni salınan ağaclar Abşeronun daha təmiz və yaşıl gələcəyinə hesablanan ardıcıl siyasətin göstəricisidir.

Bu gün Abşeronda təbiətə qayğı açıq şəkildə hiss olunur. Torpaq nəfəs alır, yeni əkilən ağaclar isə sabahın yaşıllığını müjdələyir. Keçirilən iməclik aksiyaları bir daha sübut edir ki, birlikdə görülən iş həm ətraf mühiti qoruyur, həm də şəhərin və kəndlərin simasını dəyişir. Əhalinin bu prosesdə fəal iştirakı ictimai həmrəyliyin güclənməsinə də mühüm töhfə verir.

Xüsusilə vurğulanmalıdır ki, iməcliklər yalnız mərkəzlə məhdudlaşmır, rayonun bütün kənd və qəsəbələrini əhatə edir. Bu da Abşeronun hər bir yaşayış məntəqəsində eyni dərəcədə səliqə-sahman yaradılmasına, insanların yaşayış keyfiyyətinin yüksəldilməsinə xidmət edir.

Nəticə etibarilə, Abşeron rayonu bu gün daha təmiz, daha yaşıl və daha sağlam gələcəyə doğru inamla addımlayır. Davamlı şəkildə həyata keçirilən iməclik aksiyaları göstərir ki, təbiətə qayğı və insan rifahı Abşeronun inkişaf strategiyasının əsas prioritetlərindəndir.