Türkiyəli aktyor Venesiyada dünyaca məşhur mükafata layiq görüldü - FOTO

Türkiyənin tanınmış aktyorlarından Alp Navruz beynəlxalq arenada mühüm uğura imza atıb. Aktyor 83-cü Venesiya Film Festivalı çərçivəsində keçirilən Kineo Mükafatlarında “Ən yaxşı beynəlxalq kişi aktyor” (“Best International Actor”) mükafatına layiq görülüb.

Məlumata görə, 36 yaşlı aktyor mükafatını Venesiyada, Casa Cinema Giovani-də keçirilən 25-ci Kineo Mükafatları mərasimində alıb. Navruzun bu mükafata İtaliyada böyük maraq qazanan “Ada Masalı” (“Be My Sunshine”) serialındakı performansına görə layiq görüldüyü bildirilir. Serial İtaliyada Mediaset və Mediaset Infinity platformalarında yayımlanaraq uğur qazanıb.

Gecənin diqqətçəkən məqamlarından biri Alp Navruzun Hollivudun əfsanəvi simalarından Faye Dunaway ilə görüşməsi olub. “Bonnie and Clyde”, “Network” və “Chinatown” filmləri ilə tanınan “Oskar”lı aktrisa həmin gecə “Ömürlük nailiyyət” mükafatına layiq görülüb. Amerikalı aktrisa Nicola Peltz isə “Yüksələn ulduz” mükafatını alıb.

Beləliklə, Alp Navruz Venesiyadan karyerasının mühüm beynəlxalq mükafatlarından biri ilə ayrılıb.

Denmedia.az