Bir cümlə Yulduz Usmanovanın Nyu-York səhnəsini "əlindən aldı"

Özbəkistanın xalq artisti Yulduz Usmanovanın mayın 9-na planlaşdırılan Nyu-York konserti yəhudi icmasının etirazları fonunda ləğv edilib, lechaim.ru yazır. 

Konsertin Bruklində yerləşən məşhur “Oceana Theater” səhnəsində keçirilməsi nəzərdə tutulurdu. Təşkilatçılar tədbirin ləğv olunduğunu elan edib və tamaşaçılara biletlərin pulunun geri qaytarılacağını bildiriblər.

Qalmaqalın səbəbi müğənninin 2021-ci ildə Yaxın Şərqdəki münaqişə fonunda səsləndirdiyi antisemit açıqlamalar olub.

Videomüraciətlərindən birində o, yəhudilərə müraciətlə belə deyib:

Qoy bütün dəhşətlər sizin bütün nəslinizdə, gələcək nəsillərinizdə davam etsin. Bunu yadınızda saxlayın, yəhudilər.

Bu sözlər ciddi etiraz doğurub və sənətçinin ABŞ-dəki çıxışına qarşı kampaniyanın başlanmasına səbəb olub.

Məsələyə siyasətçilər də qoşulublar. Nassau dairəsinin rəhbəri Bryus Bleykmen federal hakimiyyət orqanlarına müraciət edərək sənətçinin ölkəyə giriş imkanının araşdırılmasını tələb edib.

Denmedia.az

O bildirib ki, belə ritorika qəbuledilməzdir.

Vəziyyətin daha da həssas qarşılanmasına səbəb olan məqamlardan biri konsertin məhz mayın 9-na — nasist Almaniyası üzərində qələbə və Holokost qurbanlarının xatirəsi ilə əlaqələndirilən tarixə təyin olunması olub.

Yəhudi icmasının nümayəndələri belə bəyanatlar fonunda konsertin keçirilməsinin qəbuledilməz göründüyünü vurğulayıblar.

Yulduz Usmanova isə üzr istəməkdən imtina edib və əvvəlki fikirlərinə yenidən baxmaq niyyətində olmadığını açıqlayıb.

Qalmaqal geniş rezonans doğurub və ictimai məkanda, xüsusilə antisemitizm məsələsində, icazə verilən sərhədlərlə bağlı müzakirələri yenidən gündəmə gətirib.