Bu xəstəxanada növbəti sosial aksiya təşkil edilib-FOTOLAR

Aksiya çərçivəsində aztəminatlı ailələrdən olan uşaqlar üçün icbari tibbi sığortanın Xidmətlər Zərfi çərçivəsində sünnət əməliyyatları təşkil olunub. Tədbirdə Sabunçu Tibb Mərkəzinin direktoru Nurəngiz Bəşirova, cərrahi işlər üzrə direktor müavini Kamil Hacıyev, inzibati işlər üzrə direktor müavini Rəşad Veysov, eləcə də Maştağa Xəstəxanasının baş həkimi, direktor müavini Namiq Nəbiyev iştirak ediblər.

Sünnət aksiyası Bakı şəhəri 1 nömrəli ümumtəhsil internat məktəbi-nin aztəminatlı ailələrdən olan 6–8 yaş aralığında 10 azyaşlı sakini üçün nəzərdə tutulub. Əməliyyatlardan əvvəl uşaqlar həkim müayinəsindən keçirilib, onların sağlamlıq vəziyyəti qiymətləndirilib və prosedur tibbi göstərişlərə uyğun şəkildə icra olunub.

Cərrahi müdaxilələr Maştağa Xəstəxanasının təcrübəli həkim-cərrahları – Ənvər Qurbanov, Elman Salamov və Səadət Ömərova tərəfindən yüksək peşəkarlıqla həyata keçirilib.

Sabunçu Tibb Mərkəzinin direktoru N. Bəşirova çıxışında bildirib ki, belə humanitar aksiyaların əsas məqsədi sosial həssas təbəqəyə dəstək olmaq, uşaqların sağlamlığının qorunmasına töhfə vermək və cəmiyyətə faydalı təşəbbüsləri davamlı şəkildə həyata keçirməkdir.

Aksiyanın sonunda uşaqlara müxtəlif hədiyyələr təqdim olunub, valideynlərə isə tibbi tövsiyələr verilib.

Sabunçu Tibb Mərkəzi tərəfindən sosial yönümlü layihələrin gələcəkdə də davam etdirilməsi nəzərdə tutulur.