Ermənistanda gərginlik artır – Dəhliz layihəsi böhrana aparır?
Sahnaz
Ermənistanın Baş naziri Nikol Paşinyanın ABŞ-da Azərbaycanla razılaşmaya imza atdıqdan sonra “Tramp yolu”nun açılması üçün Zəngəzurda təbliğat kampaniyasına başladığı deyilir. Məlumata görə, hökumət artıq bir müddətdir ictimaiyyətdə dəhlizin açılması ilə bağlı narazılığı aradan qaldırmağa çalışır. Lakin üçtərəfli bəyannamənin imzalanmasından sonra hökumət bütün güclərini səfərbər edib. İrəvan bölgədə yaşayan sakinlərin etiraza qalxmaq ehtimalından narahatdır. Bunun 2026-cı baş tutacaq parlament seçkilərinə də mənfi təsir göstərməsindən ehtiyat edilir.
Burada başqa amillər də var – Rusiyaya, Fransaya bağlı daxili qüvvələrin mümkün provokasiyası. Prosesi zədələmək, ya da ləngitmək üçün bu faktor vaxtaşırı gündəmə gətirilir. Amma Paşinyanın əsas avantajı daxildə dəstəyinin olmasıdır. Erməni xalqı Rusiyaya bağlı Köçəryan-Sərkisyan tandemini, Qərbin bəzi dairələri tərəfindən təlimatlandırılan başqa qüvvələri ciddi dəstəkləmir. Hətta kilsə ilə bağlı da vəziyyət əvvəlkindən xeyli fərqlənir. Nikol Paşinyan Eçmiədzin faktorunu xeyli dərəcədə sıxışdırıb, neytrallaşdırıb.
Denmedia.az xəbər verir ki, Globalinfo.az-a danışan politoloq Züriyə Qarayeva deyib ki, Paşinyan hökumətinin Zəngəzurda “Tramp yolu” layihəsini həyata keçirmək üçün təbliğat kampaniyası başlatması həm daxili, həm də regional siyasi baxımdan həssas bir prosesdir:
Ermənistan cəmiyyətində bu dəhlizə qarşı çıxış ehtimalı kifayət qədər realdır, çünki bir sıra ictimai və siyasi qruplar bunu ölkənin suverenliyi üçün təhlükə kimi təqdim edə bilərlər. Yerli əhali və müxalif qüvvələr kütləvi etiraz aksiyaları, sosial mediada və mətbuatda narazılıq kampaniyaları, hətta fiziki maneələr yaratmaqla layihənin icrasına əngəl törədə bilərlər. Hüquqi yolla, layihənin konstitusiyaya və ya milli qanunvericiliyə zidd olduğu iddiası ilə məhkəmələrə müraciət edilməsi də mümkündür”.
Züriyə Qarayeva
Politoloq bildirib ki, Paşinyan hökuməti bu narazılıqları aradan qaldırmaq üçün iqtisadi dividentləri ön plana çıxara, dəhlizin bölgəyə investisiya, yeni iş yerləri və ticarət imkanları gətirəcəyini vurğulaya bilər:
“Eyni zamanda təhlükəsizlik təminatları verərək, dəhlizin Ermənistanın suveren nəzarəti altında qalacağını və hərbi risk yaratmayacağını izah etməlidir. Beynəlxalq təminatların mövcudluğu da ictimai rəyi yumşalda bilər. Zəngəzur bölgəsində nüfuzlu yerli liderlərlə və ictimai fiqurlarla dialoqların qurulması, onların vasitəsilə əhali ilə birbaşa kommunikasiya aparılması da razılaşmaya dəstək qazanmaq baxımından əhəmiyyətlidir. Əks halda, daxili müqavimət layihənin gecikməsinə və ya tamamilə dayanmasına səbəb ola bilər”.
