ŞAD XƏBƏR : Bu tarixdən qiymətlər azala bilər

Vergi Məcəlləsində edilən dəyişikliklər 2026-cı il 1 yanvar tarixindən etibarən qüvvəyə minəcək. Burada sahibkarlar, xüsusilə də mikrobiznes subyektləri üçün bir sıra vergi güzəştləri nəzərdə tutulur.

Bəs vergi güzəştləri nələri dəyişəcək?

Denmedia.az xəbər verir ki, bu barədə Globalinfo.az-a danışan iqtisadçı, deputat  Vüqar Bayramov deyib ki, əsas yeniliklərdən biri mikro sahibkarlar üçün sadələşdirilmiş vergi üzrə dövriyyə limitinin 200 min manatdan 400 min manatadək artırılmasıdır.

O qeyd edib ki, bu dəyişiklik mikro sahibkarlar üçün güzəşt dairəsinin genişlənməsi deməkdir:

“Hazırda dövriyyəsi 200 min manatdan yüksək olan sahibkarlar əlavə dəyər vergisi (ƏDV) ödəyicisi kimi qeydiyyata düşür. Yeni dəyişikliklərə əsasən isə dövriyyə 200 min manatdan çox, lakin 400 min manatdan az olduğu halda, həmin sahibkarlar sadələşdirilmiş vergi ödəyicisi olaraq fəaliyyətlərini davam etdirə biləcəklər. Bu zaman ƏDV ödəməyə ehtiyac qalmayacaq”.

Vüqar Bayramov

Millət vəkilinin sözlərinə görə, bu addım mikro sahibkarların xərclərinin azalmasına və daha geniş vergi güzəştlərindən yararlanmasına imkan yaradacaq:

“Xərclərin aşağı düşməsi mikro sahibkarlara öz məhsul və xidmətləri üzrə qiymətləri azaltmaq imkanı verə bilər. Təbii ki, qiymətlərin dəyişdirilməsi sahibkarların öz qərarıdır. Bu məsələdə özəl sektora hər hansı bir müdaxilə mümkün deyil. Lakin vergi güzəştlərinin genişləndirilməsi fonunda mikro sahibkarlara məhsul və xidmətlərinin qiymətlərini yenidən nəzərdən keçirmələri tövsiyə olunur”.

İqtisadçı Emin Qəribli bildirib ki, kiçik sahibkarlara mikrobiznes sahəsində fəaliyyət göstərənlər üçün müddət uzadılıb:

“Bu güzəştlər çərçivəsində vergi öhdəliklərinin 75%-i azaldılır, qalan 25%-i isə ödənilməlidir. Yəni bu güzəşt dövrü uzadılıb. Həmçinin, nağdsız ödənişlərə tətbiq olunan sadələşdirilmiş vergi güzəştləri də sosial sığortaya aid ödənişlərə şamil edilir. Bildiyimiz kimi, 2500 manatdan yuxarı gəlir hissəsi üzrə sosial sığorta dərəcəsi 4%-dən 1%-ə endirilib. Regionlara gəldikdə isə, Naxşıvan  və Qarabağ da daxil olmaqla, bir çox regionda 10 il müddətinə vergi güzəştləri tətbiq olunub. Bu güzəştlər əsasən kiçik sahibkarlara və regional bizneslərə yönəldilib, bu da vergi yığımına müsbət təsir göstərəcək”.

Emin Qəribli

E.Qəribli qeyd edib ki, Qarabağ və Naxşıvan  bölgələrinə investisiya axınlarının artacağı gözlənilir:

“Bu güzəştlər Azərbaycanın rəqabət qabiliyyətini artırmaqla yanaşı, beynəlxalq reytinq və biznes mühitinin inkişafına da müsbət təsir göstərir. Dünya Bankının reytinqi kimi beynəlxalq qiymətləndirmələrdə irəliləyiş üçün belə preferensiyaların tətbiqi mühüm rol oynayır. Qonşu və regional ölkələrdə, eləcə də Çindən başlayaraq digər regionlarda da investorları cəlb etmək üçün güzəştlər tətbiq olunur. Bu, iqtisadi rəqabətdə əsas alətlərdən biridir. Güzəştlərin əsas məqsədi investisiyaların cəlb olunmasıdır. Azərbaycan indiki inkişaf səviyyəsində həm daxili resurslardan istifadə etməklə, həm də xarici investisiyaları cəlb etməklə yeni texnologiyalar, biliklər və bazarlara çıxış imkanlarını əldə edə bilər. Nəticə etibarilə, bu güzəştlərin Azərbaycanın dayanıqlı inkişafına müsbət təsir göstərəcəyi qənaətindəyəm”.