Azərbaycanda müəmmalı durum: 4 milyard manat haradan gəlir?

Azərbaycanda iqtisadi göstəricilərdə yaranan ziddiyyət diqqət çəkib. Belə ki, Beynəlxalq Valyuta Fondunun məlumatına görə, ölkədə bu ilin ilk 7 ayında iqtisadi artım cəmi 0,9 faiz olub. Paralel olaraq, İqtisadiyyat Nazirliyi illik proqnozu 3,7 faizdən 3-ə endirib. Maraqlıdır ki, ilin 8 ayında Dövlət Vergi Xidməti 11,56 milyard manat vergi yığıb, bu da proqnozdan 600 milyon manat çoxdur. Eyni dövrdə Maliyyə Nazirliyi büdcəni təxminən 800 milyon manat ixtisar etsə də, 8 ayın sonunda büdcədə 4 milyard manat profisit yaranıb. Qeyd edilənlər iqtisadi artım və büdcə icrasında mübahisəli vəziyyətin yaranmasına səbəb olub.

Cüzi iqtisadi artım fonunda Vergi Xidmətinin proqnozdan çox vəsait yığması və büdcədə 4 milyard manat profisit yaranması hansı amillərlə izah oluna bilər?

DenMedia.az xəbər verir ki, bunu Globalinfoya-a danışan REAL Partiyasının sədri, iqtisadçı Natiq Cəfərli deyib ki, iqtisadi artım zəiflədiyi bir dövrdə vergi daxilolmalarının artması bir sıra məqamlarla izah edilə bilər:

“Bu, ya vergilərin yüksəldilməsin, ya da vergidən yayınmanın azalmasından qaynaqlanır. Əvvəllər xüsusilə ticarət və ictimai iaşə sektorlarında vergidən yayınan müəssisələr indi daha çox vergi ödəyirlər. Yəni vergidən yayınmanın qarşısının alınması daxilolmaları artırıb. Bu mənada vergi yığımının artması bir yandan yaxşı prosesdir. Çünki bu, dövlət büdcəsinin imkanlarını genişləndirir, lakin eyni zamanda biznes üçün əlavə yük yaradır”.

Natiq Cəfərli

İqtisadçı bildirib ki, hökumət qızıl ortanı tapmalıdır:

“Vergilər elə səviyyədə müəyyənləşdirilməlidir ki, həm dövlət gəlirləri təmin olunsun, həm də sahibkarlığın inkişafı üçün resurslar qalsın”.