Azərbaycan poeziyası böyük sənətkarını itirdi: Nəriman Həsənzadə vəfat etdi
Azərbaycan poeziyasının görkəmli nümayəndəsi, Xalq şairi, dramaturq və ictimai xadim Nəriman Həsənzadə vəfat edib.
Mədəniyyət Nazirliyinin məlumatına görə, o, iyunun 26-da səhhətinin pisləşməsi səbəbindən xəstəxanaya yerləşdirilmişdi.
Nəriman Həsənzadə onlarla şeir kitabının, poemaların və dramaturji əsərlərin müəllifi olub. Ona geniş şöhrət qazandıran əsərlər sırasında “Ürəyim şeir istəyir”, “Zümrüd quşu”, “Gecəm-gündüzüm”, “Sən bağışladın”, “Nəriman”, “Nuru Paşa”, “Nabat xalanın çörəyi”, “Bütün Şərq bilsin” və “Atabəylər” yer alır.
Şairin əsərləri dünyanın bir çox dillərinə tərcümə olunub və Azərbaycan ədəbiyyatının mühüm hissəsinə çevrilib.
Milli mədəniyyətin inkişafındakı müstəsna xidmətlərinə görə Nəriman Həsənzadə “Heydər Əliyev” ordeni də daxil olmaqla yüksək dövlət mükafatlarına layiq görülüb.
