C vitamini soyuqdəymədən qoruyur? – Həkim məşhur inancı alt-üst etdi
Soyuqdəymə mövsümündə immuniteti gücləndirmək məqsədilə C vitamini qəbul etmək düşündüyümüz qədər faydalı olmaya bilər.
Terapevt Svetlana Burnatskaya “Gazeta.Ru”ya açıqlamasında bildirib ki, C vitamininin qida əlavəsi şəklində qəbulu kəskin respirator virus infeksiyalarından etibarlı qorunma təmin etmir.
Həkimin sözlərinə görə, antioksidantlar hüceyrələrin zədələnmədən qorunmasında mühüm rol oynasa da, orqanizmin həddindən artıq yüksək vitamin dozalarına ehtiyacı yoxdur.
“Əsas məsələ tarazlığı qorumaqdır. Vitaminin çox qəbul edilməsi onun daha faydalı olması demək deyil”, – deyə mütəxəssis vurğulayıb.
O bildirib ki, C vitamininin yüksək dozada qəbulu ürəkbulanma, qarın ağrısı və ishala səbəb ola bilər. Böyrək daşı yaranmasına meyilli insanlarda isə bu risk daha da arta bilər.
Həkimin sözlərinə görə, gündəlik C vitamini ehtiyacını meyvə, tərəvəz və giləmeyvələr vasitəsilə qarşılamaq mümkündür.
Vitamin əlavələrindən isə əsasən tibbi göstəriş olduqda, məsələn, vitamin çatışmazlığı zamanı istifadə edilməlidir.
Mütəxəssis xatırladıb ki, heç bir vitamin əlavəsi keyfiyyətli yuxunu, balanslaşdırılmış qidalanmanı və zəruri müalicəni əvəz edə bilməz.
