İşdən vaxt tapa bilməyən ataların nəzərinə – Uşaqların buna ehtiyacı var
İş qrafiki sıx olan atalar övladları ilə yaxın münasibətləri qorumaq üçün hər gün onlara vaxt ayırmalıdırlar. Əks halda, zamanla ata ilə uşaq arasında emosional uzaqlaşma yarana bilər.
Bu barədə uşaq psixoloqu Darya Dugentsova Life.ru ilə söhbətində bildirib.
Mütəxəssisin sözlərinə görə, ataların övladlarına gündə ən azı 45 dəqiqə vaxt ayırması tövsiyə olunur. Lakin burada əsas məsələ birlikdə keçirilən vaxtın müddətindən çox, ünsiyyətin müntəzəm olmasıdır.
Məsələn, ata səhər uşağı ilə 20 dəqiqə, axşam isə 25 dəqiqə vaxt keçirə bilər.
Psixoloq vurğulayıb ki, uşaq atasının onun üçün hər zaman vaxt tapa biləcəyinə əmin olmalıdır. Bu, onda təhlükəsizlik hissi yaradır və qarşılıqlı etimadın formalaşmasına kömək edir.
Dugentsova uşağın yaşına uyğun ünsiyyət üsullarının seçilməsini də tövsiyə edib.
Onun sözlərinə görə, üç yaşadək uşaqlarla ətraf aləmi birlikdə kəşf etmək, məktəbəqədər yaşlılarla stolüstü və hərəkətli oyunlar oynamaq faydalıdır. İbtidai sinif şagirdləri ilə konstruktor yığmaq, əl işləri hazırlamaq və kitab oxumaq məsləhət görülür.
Yeniyetmələrlə münasibətdə isə onların fikirlərinə və şəxsi sərhədlərinə hörmət etmək vacibdir. Ata övladı ilə gəzintiyə çıxa, idmanla məşğul ola və gündəlik mövzularda söhbət edə bilər.
“Uşaq sözlərdən daha çox bu hissi yadda saxlayır: ‘Atama ehtiyacım olanda o, mənə cavab verir’. Məhz belə kiçik məqamlar uzun müddət davam edən etimadın əsasını təşkil edir”, – deyə psixoloq bildirib.
Mütəxəssis qeyd edib ki, birlikdə müntəzəm vaxt keçirmək kifayət deyil. Ata övladı ona müraciət etdikdə imkan daxilində işlərini kənara qoymalı, uşağı dinləməli və onun ehtiyaclarına həssas yanaşmalıdır.
