Belə toy görməmisiniz: Su basmış kilsədə evləndilər
Filippində su basmış kilsədə keçirilən toy mərasimi sosial şəbəkələrdə böyük maraq doğurub.
Hadisə sentyabrın 1-də Bulakan əyalətinin Haqonoy şəhərində baş verib. Güclü yağışlar nəticəsində Müqəddəs İohann Vəftizçi Katolik Kilsəsi qismən su altında qalsa da, Leann Lieza Qalanq və Gilbert Çiko toylarını təxirə salmamaq qərarına gəliblər.
Gəlin ağ gəlinlikdə bulanıq suyun içindən keçərək mehraba doğru irəliləyib. Kilsənin içində suyun səviyyəsi bəzi qonaqların belinə qədər çatıb.
Kilsə nümayəndələri cütlüyə suyun qalxması səbəbindən mərasimi təxirə salmağı əvvəlcədən təklif etsələr də, onlar planlarını dəyişməyiblər. Nəticədə keşiş mərasimin qısaldılmış variantını keçirib və cütlük rəsmi şəkildə evlənib.
Bəy sonradan deyib: “Paltarımızın və kostyumumuzun islanması bizim üçün önəmli deyildi.” Gəlin isə suyun içində daha rahat hərəkət etmək üçün gəlinliyinin uzun şleyfini qısaltmalı olub.
Toyda 15-dən az qonaq iştirak edib. Kilsənin yaydığı görüntülərdə qonaqların suyun içində dayandığı, üzükləri daşıyan uşağın isə kilsə skamyaları arasındakı su basmış keçiddən irəlilədiyi görünür.
Bölgədə daşqınlara avqust ayında Filippinin şimalına yağan qeyri-adi güclü mövsümi yağışlar səbəb olub. Rəsmi məlumatlara görə, leysanların yaratdığı daşqın və torpaq sürüşmələri nəticəsində azı 34 nəfər həyatını itirib.
