Karyera, sabitlik, şüurlu analıq – Gec ana olmağın üstünlükləri

35 yaşdan sonra ana olmağın bir sıra üstünlükləri var. Bu yaşda hamiləlik çox vaxt daha şüurlu və planlaşdırılmış qərar olur.

Tibb elmləri namizədi, mama-ginekoloq və reproduktoloq Lyubov Yefremova Life.ru-ya bildirib ki, bu yaşa qədər bir çox qadın təhsilini tamamlayır, karyerasını qurur, maliyyə məsələlərini həll edir və emosional baxımdan daha sabit olur.

Həkimin sözlərinə görə, yetkin yaşda ikinci və ya növbəti dəfə ana olan qadınlar analığı daha sakit və şüurlu yaşamaq istədiklərini deyirlər.

Yefremova qeyd edib ki, müasir tibbdə getdikcə daha çox pasport yaşından deyil, qadının bioloji yaşından və reproduktiv sağlamlığından danışılır.

Onun sözlərinə görə, bir qadının 39 yaşında sağlamlığı və hamilə qalmaq şansı yüksək ola bilər, digər qadında isə artıq 32–33 yaşda reproduktiv potensial azala bilər.

Buna görə hamiləlik planlaşdırarkən yalnız yaşa deyil, müayinələrin nəticələrinə, yumurtalıq ehtiyatına və ümumi sağlamlıq vəziyyətinə baxmaq vacibdir.

Həkim vurğulayıb ki, 35 yaşdan yuxarı olmaq hamiləlik üçün əks-göstəriş deyil. Sadəcə bu halda düzgün planlama, sağlamlığa diqqət və həkim nəzarəti daha böyük əhəmiyyət daşıyır.

Denmedia.az