Fotoları silməyə əliniz gəlmir? Səbəb “rəqəmsal narahatlıq” ola bilər
Telefon və kompüterdə yığılan minlərlə fotonu bir anda çeşidləməyə çalışmaq insanda “rəqəmsal narahatlıq” yarada bilər.
Bu barədə LIFE.ru-ya psixoloq Anastasiya Lısakova bildirib.
Onun sözlərinə görə, ən rahat üsul foto arxivini hissə-hissə və gündəlik kiçik intervallarla təmizləməkdir.
“Gündə cəmi 10 dəqiqə ayırmaq kifayətdir. Məsələn, səhər yeməyindən sonra. Bir həftə, hətta 3–4 gün ərzində düşündüyünüzdən daha çox işi bitirmək mümkündür. Problem ondadır ki, biz böyük həcmdə işi bir dəfəyə görmək istəyirik”, – psixoloq deyib.
Mütəxəssis həmçinin bulud yaddaş xidmətlərindən istifadə etməyi tövsiyə edib. Onun sözlərinə görə, bəzi sistemlər eyni fotoları avtomatik müəyyənləşdirə, dublikatları silməyi təklif edə və telefon yaddaşını boşaltmağa kömək edə bilər.
Yəni əsas qayda sadədir: qalereyanı bir gündə “xilas etməyə” çalışmayın. Gündə 10 dəqiqə ayırmaq daha rahat və davamlı nəticə verə bilər.
