Stress, qida çatışmazlığı və ağ saçlar: nə etmək olar? - FOTO
saida
Ağ saçlar artıq yalnız yaşla bağlı problem hesab olunmur. Mütəxəssislər bunu stress, həyat tərzində dəyişikliklər və qida maddələrinin çatışmazlığı ilə əlaqələndirirlər.
Tez nəticə əldə etmək mümkün olmasa da, düzgün qidalanmanın saçların sağlam görünüşünü və strukturunu dəstəkləyə biləcəyi bildirilir.
Ayurveda üzrə mütəxəssis Diksa Bhavsar Savaliya vaxtından əvvəl ağarmanın qarşısını almağa kömək edə biləcək bir sıra məhsulların adını çəkib.
Onun sözlərinə görə, amla saçları daxildən qidalandırır. Bu meyvə antioksidantlar və C vitamini ilə zəngindir. Belə maddələrin saçları möhkəmləndirdiyi və onların təbii rəngini qorumağa kömək etdiyi bildirilir. Amlanı təzə halda yemək və ya toz formasında ilıq suya əlavə etmək olar.
Qara küncüt toxumları da saç rənginin qorunması baxımından faydalı hesab olunur. Bildirilir ki, bu toxumlar saçın təbii rənginə cavabdeh olan piqment istehsalı ilə bağlı hüceyrələrin fəaliyyətini dəstəkləyə bilər. Onları xəmir məmulatlarına əlavə etmək və ya gündə bir çay qaşığı qəbul etmək mümkündür. Küncüt yağı isə baş dərisini qidalandırmağa və qan dövranını yaxşılaşdırmağa kömək edə bilər.
Qara kişmiş dəmir və C vitamininin təbii mənbəyi sayılır. Bu maddələr saçların piqmentasiyasını və uzanmasını dəstəkləyə bilər. Mütəxəssislər qara kişmişi gecədən suda isladıb səhər yeməyi tövsiyə edirlər.
Karri yarpaqları isə A, C və B qrupu vitaminləri, həmçinin dəmir və kalsiumla zəngin hesab olunur. Bu maddələrin saç tökülməsini azaltmağa və ağarmanın sürətini zəiflətməyə kömək edə biləcəyi bildirilir. Karri yarpaqlarını gündəlik yeməklərə əlavə etmək və ya bir neçə yarpağı suda qaynadaraq dəmləmə şəklində içmək olar.
Mütəxəssislər saçların sağlamlığını qorumaq üçün bir neçə vərdişə də diqqət etməyi məsləhət görürlər: stress səviyyəsini nəzarətdə saxlamaq, saçları fen və ya burma alətləri ilə həddindən artıq qurutmamaq, baş dərisini mütəmadi masaj etmək, yuxu rejiminə fikir vermək və saçlarla daha ehtiyatlı davranmaq.
Bununla belə, heç bir məhsul saçların ağarmasını tam dayandırmağa zəmanət vermir. Lakin balanslı qidalanma, kompleks qulluq və sağlam həyat tərzi saçların daha güclü, parlaq və sağlam görünməsinə kömək edə bilər.
