Gənclik vədi aldadır - kollagen hamıya lazım deyil

Profilaktik məqsədlə kollagen istifadəsi pulun boşa xərclənməsi ola bilər. Bu barədə Anastasiya Samoylova NEWS.ru-ya açıqlamasında bildirib.

Onun sözlərinə görə, bu əlavəni yalnız tibbi göstəriş olduqda qəbul etmək lazımdır. Hazırda suda həll olunan kollagen böyük populyarlıq qazanıb — bloqerlər və influenserlər onu gəncliyin, parlaq dərinin və sağlam oynaqların açarı kimi təqdim edir. Lakin əsas məqam ondan ibarətdir ki, kollagen möcüzəvi vasitə deyil, sadəcə “tikinti materialıdır”.

Həkim vurğulayıb ki, bu maddənin faydalı olması üçün orqanizmdə ümumi balansın bərpa olunması vacibdir. Buna görə də qırışların qarşısını almaq üçün kollageni səbəbsiz qəbul etmək mənasızdır. Effekt yalnız konkret hallarda — məsələn, oynaqların zədələnməsindən sonra reabilitasiya dövründə və ya zülal çatışmazlığı fonunda açıq qocalma əlamətləri olduqda müşahidə edilə bilər.

Samoylova izah edib ki, əlavədən gələn amin turşuları ilk növbədə yaraların sağalmasına, qığırdaq toxumasının bərpasına və fermentlərin sintezinə yönəlir. Eyni zamanda əsas prioritet orqanizmin normal fəaliyyətini təmin etmək və onun öz kollagenini sintez etməsinə şərait yaratmaqdır.

DenMedia.az