Buxaqdan necə qurtulaq?
saida
Üz gimnastikası buxaqdan qurtulmağa kömək edir. Bu barədə NEWS.ru-ya danışan həkim-kosmetoloq və plastik cərrah Zuxra Balakərimova bildirib.
Onun sözlərinə görə, buxaq genetika, yaş, artıq çəki və hətta duruş pozuntusu ilə bağlı yarana bilər.
Bu problemi aradan qaldırmaq üçün isə kompleks yanaşma vacibdir.
Mütəxəssis qeyd edib ki, ən sadə üsullardan başlamaq lazımdır. Boyun və çənə üçün məşqlər üzün ovalını dəstəkləyən əzələləri gücləndirir. Gündəlik 10–15 dəqiqəlik gimnastika — başın əyilməsi, çənənin irəli uzadılması və əl ilə müqavimət hərəkətləri — zamanla dərini dartır və konturları daha aydın edir.
Balakərimova vurğulayıb ki, bu məşqlərin effekti düzgün duruşla daha da artır. Düz bel saxlamaq və başı önə əyməmək buxağın görünüşünü əhəmiyyətli dərəcədə azaldır.
Eyni zamanda, massaj və limfodrenaj da mühüm rol oynayır. Bir neçə seansdan ibarət peşəkar kurs və ev şəraitində yüngül özünümassaj şişkinliyi azaldır, qan dövranını yaxşılaşdırır və çənə xəttini daha səliqəli edir. Effektin artırılması üçün roller massaj cihazları və soyuq kompreslər də istifadə oluna bilər.
Salon prosedurlarına gəldikdə isə, ən çox istifadə olunan üsullar arasında lipolitik inyeksiyalar, ultrasəs, radiotezlik liftinqi və kriolipoliz yer alır. Bu metodlar yağ yığıntılarına birbaşa təsir edir və kollagen istehsalını stimullaşdırır.
