Yuxu problemlərinin səbəbi bəzən yanınızda yatan insan olur

Araşdırmalara görə, böyüklərin təxminən 29 faizi partnyorları səbəbindən kifayət qədər yata bilmir. Üstəlik, bu problem qadınlarda kişilərə nisbətən daha çox müşahidə olunur.

Məlumata görə, kişilərin yuxusu adətən daha dərin olur, buna görə onları oyatmaq çətin olur. Lakin onlar daha çox xoruldayır və tez-tez “narahat ayaqlar sindromu” ilə üzləşirlər. Bu zaman insan yuxu zamanı ayaqlarını qeyri-iradi şəkildə hərəkət etdirir.

Eyni zamanda qadınların yuxusu daha həssas hesab olunur. Bu xüsusiyyətin təkamül prosesində formalaşdığı ehtimal edilir, çünki tarixən qadınlar uşağın ehtiyaclarına daha tez reaksiya verməli olublar.

Bundan başqa, yuxu hormonu hesab edilən melatoninin ifrazı da yuxunun keyfiyyətinə təsir edir. Xüsusilə yaş artdıqca və hormonal dəyişikliklər baş verdikcə yuxu rejimi daha asan pozula bilər.

Mütəxəssislər qeyd edir ki, yaş artdıqca insanın yuxusu daha həssas olur və işıq, səs-küy, narahat yastıq kimi xırda amillər belə tez oyanmağa səbəb ola bilər.

Əgər yuxuya mane olan amil partnyorla bağlıdırsa, belə hallarda yuxu çatışmazlığı zamanla xroniki hala çevrilə bilər. Uzunmüddətli yuxu çatışmazlığı isə hormonal balansın pozulmasına, metabolik problemlərə və ümumi sağlamlıq problemlərinə səbəb ola bilər.

DenMedia.az