İşdə mobilə “stop”: rəhbərin buna haqqı çatırmı?

Bir çox iş yerində tanış mənzərədir: bildiriş səsi, sürüşdürülən ekran, “cəmi bir dəqiqə”. Elə bu “bir dəqiqə”lərin çoxalması rəhbərləri telefon qadağası barədə düşünməyə vadar edir. Bəs bu qanunidirmi?

Bəli, rəhbər iş vaxtı telefon istifadəsini məhdudlaşdıra bilər. Amma bunu istədiyi kimi yox. Qadağa aydın qayda şəklində yazılmalı, işçilərə əvvəlcədən bildirilməli və əmək qanunvericiliyinə uyğun olmalıdır. Yəni “bu gündən telefon olmaz” tipli şifahi göstərişlər risklidir.

Burada incə məqam var: telefonu əlindən almaq olmaz. İşəgötürən şəxsi əşyaları müsadirə edə bilməz, məcburi şəkildə “təslim et” demək də qanunsuzdur. Bunun əvəzinə nə edə bilər?
– Müəyyən zonalarda telefon istifadəsini qadağan edə bilər.
– İş yerinə telefonla girişə məhdudiyyət qoya bilər.
– İstəyənlər üçün könüllü şəkildə telefonların şkafa qoyulmasını təşkil edə bilər.

Qaydanı pozanlara gəlincə: cərimə olmaz, amma intizam tənbehi (xəbərdarlıq, töhmət və s.) mümkündür. Yəni pul yox, qayda işləyir.

Nəticə? Telefon qadağası mümkündür, amma ağılla tətbiq olunarsa. Əks halda motivasiya düşür, gərginlik artır. Ən sağlam yol balansdır: iş zamanı fokus, fasilədə isə azadlıq. Çünki problem telefonda yox, harada və nə vaxt istifadə edilməsindədir.

DenMedia.az