Honq-Konqda bıçaqlı hücum: 22 yaşlı şəxs iki nəfəri yaraladı
Honq-Konqda Baguio Villa yaşayış kompleksində 22 yaşlı şəxsin bıçaqlı hücumu nəticəsində iki nəfər yaralanıb.
Hadisə səhər saatlarında baş verib. Şübhəli əvvəlcə yoldan keçən kişiyə hücum etməyə çalışıb, daha sonra təhlükəsizlik əməkdaşı ilə əlbəyaxa olub. Qaçarkən isə 61 yaşlı əcnəbi qadını kürək nahiyəsindən bıçaqlayıb.
Təhlükəsizlik əməkdaşları və ətrafdakılar şübhəlini zərərsizləşdirib, polis onu saxlayıb. Yaralanan qadın və təhlükəsizlik əməkdaşı xəstəxanaya yerləşdirilib.
Polisin şübhəlinin evində apardığı axtarış zamanı qulağından yaralanmış pişik də aşkarlanıb və müalicə üçün SPCA-ya təhvil verilib.
Hadisə təhlükəsizlik kameralarına düşüb. Hücumun motivi hələlik məlum deyil, araşdırma davam edir.
