Getty Images üçün kritik qərar: Şirkət birjadan gedir
Dünyanın ən tanınmış foto və vizual kontent platformalarından biri olan Getty Images restrukturizasiya çərçivəsində iflas proseduruna müraciət etməyə və özəl şirkətə çevrilməyə hazırlaşır.
“The Hollywood Reporter” və “Reuters”in məlumatına görə, şirkət ABŞ-da müəyyən hüquqi şəxslər üzrə sürətləndirilmiş “Chapter 11” iflas prosedurundan istifadə etməyi planlaşdırır.
Razılaşmaya əsasən, Getty ailəsinə bağlı qurumlar və Koch Equity Development şirkətə 533 milyon dollaradək yeni kapital yatıracaq. Eyni zamanda, şirkətin borclarının bir hissəsinin azaldılması, faiz xərclərinin aşağı salınması və ödəniş müddətlərinin uzadılması nəzərdə tutulur.
Restrukturizasiya başa çatdıqdan sonra Getty Images birjadan çıxacaq və tamamilə özəl mülkiyyətə keçəcək.
Şirkətin bu addımı Shutterstock ilə planlaşdırılan 3,7 milyard dollarlıq birləşmənin baş tutmamasından bir neçə ay sonra atılıb. Sövdələşmə Böyük Britaniyanın rəqabət qurumunun irəli sürdüyü şərtlər səbəbindən dayandırılmışdı.
Getty Images restrukturizasiya prosesinin ilin sonunadək tamamlanacağını, bu müddətdə isə fəaliyyətini normal şəkildə davam etdirəcəyini bildirir.
