Bir milyon gənc nə işləyir, nə də oxuyur: Britaniyaya illik zərər açıqlandı
Böyük Britaniyanın işləməyən, təhsil almayan və peşə hazırlığında iştirak etməyən gənclər səbəbindən hər il təxminən 125 milyard funt sterlinq itirdiyi bildirilir.
The Guardian yazır ki, ölkədə təxminən 1 milyon gənc “NEET” kateqoriyasına daxildir — yəni onlar nə işləyir, nə oxuyur, nə də peşə hazırlığı keçir.
Nəşrin məlumatına görə, 2008-ci il maliyyə böhranı və COVID-19 pandemiyası dövründə böyüyən bu nəsil hazırda yaşayış xərclərinin artması, dövlət xidmətlərinin azalması və süni intellektin əmək bazarını dəyişməsi fonunda ciddi çətinliklərlə üzləşir.
Britaniyada gənclərlə bağlı xidmətlərə ayrılan xərclərin 76 faiz azaldıldığı, minlərlə gənclər klubunun bağlandığı və sosial işçilərin sayının azaldığı qeyd olunur.
The Guardian vurğulayır ki, problemli sosial nəticələrin qarşısını əvvəlcədən almaq əvəzinə, hökumət sonradan onların fəsadlarına daha böyük vəsait xərcləməli olur.
