Brüssel Budapeşt üçün dondurulmuş vəsaitləri açır
saida
"Avropa Komissiyası Macarıstan üçün Aİ fondlarından dondurulmuş milyardlarla avronu açmağa hazırlaşır. Buna səbəb Budapeştin tələb olunan islahatları yerinə yetirməsi göstərilir".
Bunu Avropa Komissiyasının sədri Ursula fon der Lyayen Macarıstanın Baş naziri Peter Madyar ilə görüşdən sonra keçirdiyi birgə mətbuat konfransında bildirib.
“Beləliklə, islahatların qəbul edilməsi və investisiyaların həyata keçirilməsi şərti ilə bu gün Macarıstan üçün 10 milyard avronu açmağa hazır olduğumuzu elan etməkdən çox məmnunam”, deyə fon der Lyayen qeyd edib.
Onun sözlərinə görə, Avropa İttifaqının birlik fondları ilə bağlı ciddi irəliləyiş əldə olunub.
“Əsas mərhələlər üzrə irəliləyiş sayəsində biz həmçinin qanunun aliliyi şərti ilə bağlı 4,2 milyard avroluq birlik fondlarını da aça bildik”, deyə Avropa Komissiyasının sədri əlavə edib.
Fon der Lyayen hesab edir ki, ölkənin yeni rəhbərliyi Macarıstanda əsas hüquqların qorunması, xüsusilə də akademik azadlıq sahəsində nəticələr əldə edib.
Macarıstan mərhələli şəkildə maraqlar toqquşması və dürüstlük prinsiplərinə əməl olunması ilə bağlı problemlərin həllinə yönəlmiş qanunlar qəbul edəcək. Bundan sonra dondurulmuş vəsaitlərin son tranşı da əlçatan ola bilər.
“Akademik azadlıq çoxdan gözlənilirdi. Bu, Macarıstana birlik fondlarından daha 2,2 milyard avro almağa imkan verəcək”, deyə Ursula fon der Lyayen bildirib.
O, bununla yanaşı qeyd edib ki, uşaqların müdafiəsi haqqında qanunla bağlı əlavə addımlar atılmalıdır. Lakin onun fikrincə, proses düzgün istiqamətdə gedir.
Qeyd edək ki, Avropa Komissiyası Budapeştin qanunun aliliyi prinsiplərini pozması səbəbindən Macarıstana Aİ fondlarından ödənişləri bloklayırdı.
