ABŞ–İran qarşıdurması Yapon iqtisadiyyatına zərbə vurdu

Yaponiyada aparılan sorğuya görə, Yaxın Şərq böhranı ölkə şirkətlərinin təxminən 80 faizinə mənfi təsir göstərib. Bu barədə Tokyo Shoko Research-un araşdırmasına istinadən Jiji agentliyi məlumat yayıb.

Tədqiqatda 7 mindən çox şirkət iştirak edib. Onların 78,7 faizi ABŞ–İran qarşıdurması və onun iqtisadi nəticələrinin fəaliyyətlərinə ciddi zərbə vurduğunu etiraf edib. Şirkətlərin böyük hissəsi üçün əsas problem neft emalı üçün xammal xərclərinin kəskin artması (70,4 faiz) olub. Təxminən 65 faiz isə yanacağın bahalaşmasından şikayət edib.

Hazırda şirkətlərin 15 faizindən çoxu strategiyasını yenidən nəzərdən keçirməyə məcbur qalıb, ekspertlər isə bu rəqəmin daha da arta biləcəyini istisna etmir.

Bundan əlavə, Yaponiyanın iri kimya şirkətləri plastik və sintetik lif istehsalı üçün vacib olan etilen zavodlarının dayanmasının qarşısını almağa çalışır. Bunun səbəbi isə Yaxın Şərqdəki böhran fonunda karbohidrogen idxalında yaranan problemlərdir.

Yaponiya hökuməti hesab edir ki, Fars körfəzi regionundakı vəziyyət uzunmüddətli həllini tapmayana qədər ölkə iqtisadiyyatına mənfi təsir davam edəcək.

DenMedia.az