Müharibə fonunda İranda çörək böhranı təhlükəsi yarandı

İranda ABŞ və İsraillə artan gərginlik fonunda bəzi çörək zavodları və çörəkbişirmə müəssisələri fəaliyyətini dayandırmağa və bağlanmağa başlayıb.

İran Ticarət və Sənaye Palatasının rəhbəri Samad Həsənzadə bildirib ki, belə addım atan müəssisələrə qarşı dövlət tərəfindən tədbirlər görülə bilər. Onun sözlərinə görə, ölkədə ərzaq təhlükəsizliyinin qorunması prioritet məsələdir və çörək istehsalının dayandırılması ciddi problemlər yarada bilər.

Eyni zamanda qeyd olunur ki, martın əvvəlində Rusiya İrana taxıl tədarükünü müvəqqəti dayandırıb. Reuters agentliyinin mənbələrinə görə, buna səbəb daşınma tariflərinin (fraxt) kəskin artması və ödənişlərlə bağlı yaranan çətinliklər olub.

Ekspertlər bildirirlər ki, taxıl tədarükünün azalması və müəssisələrin fəaliyyətini dayandırması ölkədə çörək istehsalı və ərzaq bazarında təzyiqi artıra bilər. Bu isə xüsusilə müharibə və sanksiyalar fonunda İranda iqtisadi vəziyyətə əlavə təsir göstərən amillərdən biri kimi qiymətləndirilir.

Denmedia.az