Dakardan 3 qızıl, 3 gümüşlə qayıdırıq – Azərbaycan 13-cü oldu

Seneqalın paytaxtı Dakarda keçirilən IV Yay Yeniyetmələrin Olimpiya Oyunları başa çatıb. Azərbaycan millisi ümumi medal sıralamasında 13-cü yeri tutub.

İdmançılarımız yarışlarda üç qızıl və üç gümüş olmaqla ümumilikdə 6 medal qazanıblar.

Cüdoçu İbrahim Talıbov (55 kq), çimərlik güləşi üzrə Tunar Quliyev (70 kq) və Elgün Kərimli (90 kq) Olimpiya çempionu olublar.

Güləşçi Nihat Süleymanlı (80 kq), taekvondoçu Adil Kazımlı (73 kq) və boksçu Gülər Hüseynova (51 kq) isə gümüş medala sahib çıxıblar.

Ümumi medal sıralamasında 18 qızıl, 8 gümüş və 7 bürünc olmaqla 33 medal qazanan Çin birinci yeri tutub. Yaponiya 28 medalla (11 qızıl, 8 gümüş, 9 bürünc) ikinci, Rusiya isə 14 medalla (8 qızıl, 4 gümüş, 2 bürünc) üçüncü olub.

Beləliklə, Azərbaycan millisi Yeniyetmələrin Olimpiya Oyunlarını 6 medalla başa vurub. Medalların hamısı cüdo, çimərlik güləşi, taekvondo və boks olmaqla dörd idman növündə qazanılıb.