“Neftçi” Freddi Varqasla müqavilə imzaladı

Bakının “Neftçi” futbol klubu venesuelalı hücumçu Freddi Varqasla müqavilə imzalayıb.

Bu barədə klubun mətbuat xidməti məlumat yayıb.

27 yaşlı futbolçu ilə müqavilə “2+1” formatında bağlanıb. Saziş iki il müddətinə nəzərdə tutulub və daha bir mövsüm uzadıla bilər.

“Transfermarkt” portalının məlumatına görə, Varqasın bazar dəyəri 900 min avro olaraq qiymətləndirilir.

Hücumçu 2025-ci ilin yayında İsrailin “Makkabi Netanya” klubundan birillik icarə əsasında “Neftçi”yə keçmişdi. Müqavilədə sonradan transfer hüququnun alınması imkanı da nəzərdə tutulmuşdu.

Varqas Bakı klubunun heyətində 34 oyuna çıxıb, 5 qol vurub və 8 məhsuldar ötürmə edib.

Venesuela millisinin üzvü olan futbolçu karyerası ərzində “Deportivo Lara” və ABŞ-ın “Dallas” klublarında da çıxış edib.

DenMedia.az