DÇ-2026: ABŞ millisi 1/16 finala yüksəldi
saida
ABŞ millisi 2026-cı il futbol üzrə dünya çempionatında pley-off mərhələsinə vəsiqə qazanan ikinci komanda olub.
Amerikalılar Avstraliya yığması üzərində qələbə sayəsində pley-offa çıxışı təmin ediblər. Daha əvvəl Meksika millisi də növbəti mərhələyə vəsiqə qazanmışdı.
FIFA-nın islahatından və dünya çempionatında iştirakçı komandaların sayının 32-dən 48-ə çatdırılmasından sonra turnirdə ilk pley-off mərhələsi 1/16 final olacaq.
ABŞ — Avstraliya oyunu Sietldəki “Lumen Field” stadionunda keçirilib və 2:0 hesabı ilə başa çatıb. ABŞ millisinin heyətində Aleks Friman fərqlənib. Avstraliya müdafiəçisi Kemeron Börcess isə avtoqol müəllifi olub.
Bu qələbədən sonra ABŞ millisi xallarının sayını 6-ya çatdırıb və qrupunda birinci pillədə möhkəmlənib.
Qeyd edək ki, DÇ-2026 iyunun 11-də başlayıb və iyulun 19-da başa çatacaq. Turnirin oyunları ABŞ, Meksika və Kanadada keçirilir. Hazırkı dünya çempionu isə Argentina millisidir.
